БАНКИТЕ ВО РЕГИОНОТ ВРТАТ МИЛИЈАРДИ Профитот достигна 31,5 милијарди евра, а ова е само почеток
Банкарите во Централна и Југоисточна Европа оствариле профит од 31,5 милијарди евра во 2025 година, со поврат на капиталот речиси двојно повисок од оној во еврозоната.
Банките во Централна и Југоисточна Европа оствариле вкупна добивка од 31,5 милијарди евра во 2025 година, што е раст од 5,7 проценти во однос на претходната година. Нивниот поврат на капиталот изнесувал меѓу 15 и 16 проценти, наспроти околу девет проценти кај банките во еврозоната.
Според извештајот на австриската банкарска групација Raiffeisen Bank International (RBI), профитот на банкарскиот сектор во регионот би можел да достигне од 37 до 38 милијарди евра годишно до 2030 година.
Растот се должи на зголеменото кредитирање, приходите од камати и провизии и подобрениот квалитет на кредитните портфолија. Особено поволно е намалувањето на нефункционалните кредити во Југоисточна Европа, чие учество паднало од околу 20 проценти во 2013 година на 2,7 проценти.
Сепак, зголемениот даночен товар останува предизвик. Дополнителните даноци на банкарските профити во Унгарија, Романија и Словачка се очекува годинава да достигнат 1,8 милијарди евра, што е за 80 проценти повеќе од минатата година.
Регионот има стратешко значење за австриските банкарски групации, чие работење во Централна и Југоисточна Европа придонесува со значителен дел од нивната добивка. Во наредните години се очекуваат натамошен раст на кредитирањето, развој на приватното банкарство и консолидација на пазарот, особено во Полска и Романија.
