ЈАС СУМ СВЕТСКИОТ ШЕФ Трамп откри како гледа на односите со светските лидери

Американскиот претседател Доналд Трамп изјави дека по конфликтот со Иран сфатил колку голема моќ има функцијата претседател на САД, откривајќи дека влијанието врз светските лидери е клучниот показател за неговата сила.

Во интервју за „Аксиос шоу“, чии делови беа објавени пред целосната емисија, Трамп зборувал за своето влијание врз меѓународната сцена, тврдејќи дека лидерите на земјите сојузници ги слушаат неговите ставови. Тој посочил дека учесниците на самитот на Г7 му верувале кога во шега рекол дека „тој е шефот“, а според него и Израел покажува голема почит кон неговите одлуки.

Во новата книга „Промена на режимот“ на новинарите Меги Хаберман и Џонатан Свон се тврди дека Трамп им покажал документ во кој се споредува моќта на американскиот претседател со историски владетели како Атила, Џингис Кан, Наполеон Бонапарта, Јосиф Сталин, Мао Це Тунг и Адолф Хитлер.

Според авторите, Трамп читал делови од документот и објаснувал дека современиот американски претседател има поголема моќ од владетелите од минатото, меѓу другото поради технологијата и можноста за глобално влијание.

„Тие немале авиони, нели? Не можеле да патуваат наоколу“, рекол Трамп, осврнувајќи се на големите освојувачи и владетели од историјата.

Хаберман и Свон наведуваат дека е впечатливо што Трамп прифаќа споредби со личности кои својата моќ ја граделе преку освојувања и силно централизирано владеење.

Од современите лидери, Трамп посебно ги истакнал кинескиот претседател Си Џинпинг и индискиот премиер Нарендра Моди, нарекувајќи го Си „целосно посветен на работата“, а Моди „тврд преговарач“.

Тој изразил и жалење поради отсуството на рускиот претседател Владимир Путин на самитот на Г7, потсетувајќи дека Русија беше дел од групата пред да биде исклучена по анексијата на Крим во 2014 година.

Говорејќи за односите со Израел, Трамп изјавил дека без неговата поддршка земјата „денес не би постоела“, но додал дека понекогаш израелскиот премиер Бенјамин Нетанјаху мора да биде „држен под контрола“.

Трамп ги критикувал и републиканците кои се спротивставиле на договорот со Иран, велејќи дека изгубил почит кон некои луѓе што порано ги ценел.

Сепак, тој признал дека постои нешто што сè уште може да ја ограничи претседателската моќ – економијата. Според него, продолжувањето на војната со Иран можело да доведе до глобална економска криза, додека падот на цените на нафтата и растот на берзанските индекси ги смета за доказ дека неговата политика била исправна.

„Имам една основна желба како претседател и никогаш не сакам да станам новиот Херберт Хувер“, рекол Трамп.

Тој алудира на американскиот претседател чие име најчесто се поврзува со Големата депресија.

Според авторите на книгата, документот што го покажал Трамп бил објавен и на неговата платформа Truth Social, каде што се тврди дека неговата подготвеност да ја користи американската моќ глобално го прави „најмоќната личност што некогаш одела по планетата“.