АЛОНСО СЕ ВРАЌА ДОМА – Ливерпул подготвува потег за шпанскиот стратег
По заминувањето од Реал, Алонсо внимателно ги следи опциите за продолжување на кариерата
Чаби Алонсо моментално одмара откако во јануари беше отпуштен од Реал Мадрид, иако зад себе остави солиден биланс од 34 натпревари и 24 победи, четири ремија и шест порази. Неговиот краток мандат на клупата на „Кралскиот клуб“ беше обележан со тензии со дел од најголемите ѕвезди, меѓу кои и Винисиус Жуниор.
Иако наскоро би можел да добие понуди за враќање во тренерската работа, Алонсо нема намера избрзано да донесе одлука. Особено внимание привлекува интересот од Ливерпул, кој, според шпанскиот весник As, веќе го остварил првиот контакт со шпанскиот стратег под наслов „Алонсо го доби првиот повик од Ливерпул“.
Ова не е првпат „црвените“ да покажат интерес. Уште во пролетта 2024 година, Алонсо одби понуди од Баерн Минхен и Ливерпул, одлучувајќи да остане во Баер Леверкузен. Сега, сепак, ситуацијата е поинаква.
Според As, на „Енфилд“ сериозно размислуваат за Алонсо како решение за блиската иднина, можеби веќе од сезоната 2026/27. Таа перспектива му е исклучително привлечна на поранешниот шпански репрезентативец, кој како играч помина пет сезони во Ливерпул.
Иако Алонсо и неговиот агент не брзаат, внимателно ги следат случувањата на пазарот. Во меѓувреме, ситуацијата во Ливерпул е напната. Актуелниот тренер Арне Слот е под силен притисок поради променливите резултати, иако клубот минатото лето инвестираше дури 482 милиони евра во засилувања. Викендов тимот претрпе нов пораз, овојпат од Борнмут.
Од управата му порачале на Слот дека ќе ја заврши сезоната, но во клубот веќе размислуваат однапред. Почитта кон Алонсо како поранешен играч и восхитот кон неговите тренерски успеси го прават идеален кандидат за иднината, наведува As.
Алонсо, наводно, уште на летот од Џеда по финалето на шпанскиот Суперкуп бил свесен дека неговото време во Реал Мадрид е при крај. И покрај обидите да ја смени ситуацијата и да ја победи Барселона, не успеал.
Двонеделниот одмор што го зема по заминувањето од Реал му помогнал да ги согледа работите од поинаква перспектива, а идејата за враќање на брегот на реката Мерси, речиси две децении подоцна, сè повеќе му изгледа како логичен и привлечен следен чекор.