АЛАРМ ВО ЕВРОПА Сè повеќе работници заминуваат на боледување поради стрес
Во Холандија бројот на денови на отсуство поради стрес пораснал за 12% за една година, а во однос на 2021 година растот достигнува 49%.
Стресот на работното место сè почесто станува причина за долготрајни боледувања, покажуваат новите податоци од Холандија, каде бројот на денови поминати на отсуство поради проблеми поврзани со стресот за само една година пораснал за 12 проценти. Во споредба со 2021 година, растот достигнува 49 проценти, што укажува на сè поголем притисок врз вработените, но и врз работодавачите.
Според стручњаците, на зголемувањето на стресот влијаат повеќе фактори, меѓу кои големиот обем на работа, финансиските грижи, здравствените проблеми и обврските поврзани со неплатена грижа за членови на семејството.
Подолгите отсуства дополнително ги оптоваруваат компаниите, особено во секторите каде веќе има недостиг од работна сила. Во такви услови, дел од обврските на отсутните работници паѓаат врз нивните колеги, што може дополнително да го зголеми работниот притисок.
Трендот не е ограничен само на Холандија. Според истражување на Европската агенција за безбедност и здравје при работа (EU-OSHA), објавено во септември 2025 година, 29 проценти од вработените во Европа пријавиле стрес, депресија или анксиозност.
Дополнително, 37 проценти од вработените пријавиле општ замор.
Податоците укажуваат дека психосоцијалните ризици на работното место сè повеќе стануваат прашање не само за здравјето на работниците, туку и за функционирањето на компаниите и пошироката економија.
