АПЕЛ ОД ФЗО Аргументирана дебата, без сензационализам во здравството
Од Фондот истакнуваат дека со должно внимание ги следат сите прашања поврзани со квалитетот, безбедноста и законитоста на здравствените услуги за осигурениците
Фондот за здравствено осигурување (ФЗО) реагираше на изјавите дека приватните болници вршат непотребни операции заради профит.
Од Фондот истакнуваат дека со должно внимание ги следат сите прашања поврзани со квалитетот, безбедноста и законитоста на здравствените услуги за осигурениците. Во последните четири години, велат од ФЗО, не се евидентирани претставки за непотребни медицински интервенции, додека по сопствен наод биле извршени девет контроли за приватно наплатени средства.
„Фондот редовно врши контроли во јавните и приватните здравствени установи за да обезбеди дека услугите се изведуваат согласно законските прописи и договорните обврски. Сепак, ФЗО нема надлежност да ја оценува медицинската оправданост на интервенциите – тоа е во домен на Државниот здравствен и санитарен инспекторат или комисии формирани од министерот за здравство,“ наведуваат од институцијата.
Фондот апелира за аргументирана и одмерена јавна дебата заснована на проверливи факти, со цел зачувување на довербата во здравствениот систем и избегнување сензационализам.
„Ќе продолжиме да работиме на заштита на правата на осигурениците и на обезбедување квалитетни здравствени услуги во рамките на нашите законски овластувања,“ порачуваат од ФЗО.