„ПРИКАЗНАТА НА ЕЛЕКТРА“ ЗА КРАЈ НА „ОХРИДСКО ЛЕТО“ – Европска премиера на театарската претстава работена по текст на Сашо Димоски

Јубилејното 65. издание на фестивалот „Охридско лето“ ќе биде затворено со европската премиера на театарската претстава „Приказната на Електра“. Драмата е работена по текст на Сашо Димоски и во режија на Дејан Пројковски, во копродукција на Театарската асоцијација од Јужна Кореја, АРТЕМА – Театарска лабораторија и НУ „Охридско лето“.

Претставата ја оживува античката митска приказна за Електра преку современ сценски јазик кој обединува визуелни слики, телесна експресија и минимален текст. Мотивите на одмазда, семејни конфликти и потребата од катарза се поставени како универзални етички прашања што ја надминуваат времето и просторот.

Овој проект е дел од плодната соработка меѓу Димоски и Пројковски, кои во последните години стојат зад наградувани продукции како „Инферно“, „Собирачи на пердуви“, „Демони“ и „Рацин“, препознаени од критиката и публиката и дома и во странство.

Во „Приказната на Електра“ настапуваат реномирани корејски актери: Ким Чоин (Електра/Ифигенија), Ким Сеонг-ми (Клитемнестра/Касандра), Чои Минхјук (Орест), Јанг Мин Ки (Агамемнон) и Ха Џин (Егист).

Финалната претстава од фестивалот ќе се одигра на Големата сцена во Центарот за култура „Григор Прличев“ на 21 часот.