ПЕТ СТОЛБОВИ ЗА НОВ, ЕФИКАСЕН ЗДРАВСТВЕН СИСТЕМ – Бесплатни медицински проверки за граѓаните над 40 години

Новиот министер за здравство, Азир Алиу, најави темелна реформа со цел создавање на систем во кој лекарите ќе можат непречено да ја вршат својата работа, а пациентите да добиваат квалитетна здравствена услуга. Тој вети решавање на долгогодишните, нерешени проблеми кои биле игнорирани или одложувани на сметка на пациентите.

„Не сум лекар и нема да оперирам срце – но ќе креирам систем во кој лекарите ќе можат да го сторат тоа со соодветни услови, опрема и простории“, изјави Алиу.

Тој најави изградба на стабилен и политички независен здравствен систем, базиран на пет стратешки столбови:

-Првпат ќе се изработи целосна мапа по региони и општини, која ќе покаже каде недостигаат лекари, опрема или функционални центри. Инвестициите ќе се темелат на реални потреби.

-Ќе се воспостави дигитална платформа за следење на перформансите на здравствените установи. „Бројките повеќе нема да се кријат по фиоки“, порача министерот.

-Фокус на обука на медицинскиот персонал и јасно раздвојување меѓу здравствените и менаџерските функции во установите.

-Болниците ќе се финансираат според бројот и ефикасноста на третманите. Се најавува и национална програма за рана превенција „Порано подобро – превенцијата започнува со тебе“.

Секој граѓанин над 40 години ќе има право на бесплатни превентивни прегледи за дијабетес, хипертензија и кардиоваскуларни болести.

-Процесот на дигитализација ќе вклучи и интеграција со европските здравствени платформи.

Министерот најави и итни мерки за подобрување на одговорот при кризни ситуации.

„За еден месец ќе имаме работни групи за справување со различни видови несреќи – било да се од човечки фактор или природни катастрофи“, изјави тој.

Во контекст на неодамнешниот пожар во дискотеката „Пулс“ во Кочани, Алиу најави посета на градот и средба со директорката на болницата за лично да се информира за состојбата на повредените пациенти и нивните семејства.

Во разговорите со директорите на клиниките, истакнато е дека главниот проблем останува недостатокот на кадар. Алиу најави дека најпрво ќе се продолжат договорите на оние кои веќе работат, а потоа ќе се вработуваат и нови кадри според реалните потреби.