НАМЕСТО ПРОЛЕТ, ЕСЕНСКО ВРЕМЕ Врнежи и студ низ целата земја

Македонија денеска, недела (25 мај), се наоѓа под влијание на ладен и влажен воздушен бран од север и североисток, што донесе невообичаено студено и врнежливо време за крајот на мај. Ваквата временска состојба е некарактеристична за овој период од годината, кога граѓаните вообичаено ги очекуваат првите позначајни затоплувања.

Врнежи од дожд се очекуваат насекаде низ земјата, со особено обилни количини во јужните и источните региони, каде локално може да наврнат над 20 до 30 литри дожд на метар квадратен. Ниските температури ќе предизвикаат и повремени врнежи од снег на планините над 1600 до 1700 метри надморска височина, каде е можно формирање на тенка снежна покривка – несекојдневна појава за мај месец.

Во Скопје и околината времето ќе биде слично: дождливо, облачно и студено. Максималната дневна температура во главниот град ќе достигне околу 15 степени Целзиусови.

Северниот ветер дополнително ќе го засили чувството на студ, особено во Повардарието, каде повремено ќе дува со брзина над 60 километри на час.

Температурите денеска ќе се движат меѓу 10 и 18 степени, што е значително под просекот за овој период од годината. Ваквото време ќе продолжи и во текот на наредната недела.

Понеделник (26 мај) ќе донесе краткотрајна стабилизација и суво време, но веќе од вторник (27 мај) метеоролозите најавуваат ново дестабилизирање на атмосферата и нов бран на врнежи.

Граѓаните се советуваат да бидат внимателни, особено на планините и на патиштата каде постои можност од намалена видливост и лизгави коловози.