БРИТАНСКИОТ ОСКАР ЗА МАКЕДОНКА Тамара Котевска со нов светски триумф, „Приказната за Силјан“ го освои Гран-при во Лондон

Македонската режисерка Тамара Котевска продолжува да ниже меѓународни успеси. Нејзиниот документарен филм „Приказната за Силјан“ (The Tale of Silyan) го освои престижното Гран-при признание за најдобар кино-документарец на овогодинешното доделување на наградите „Гриерсон“ (Grierson British Documentary Awards), што се одржа во Лондон.

Овие награди се сметаат за едни од најзначајните признанија во светската документарна кинематографија, а често се нарекуваат и „британски Оскари“ за документарни филмови.

Филмот на Котевска, реализиран во продукција на National Geographic Documentary Films и Dogwoof, триумфираше во една од најконкурентните категории, освојувајќи го највисокото признание за кино-документарец.

Наградите „Гриерсон“, основани во чест на Џон Гриерсон, кој се смета за еден од основоположниците на документарниот филм, се најстарите и меѓу најугледните награди од овој вид во Велика Британија. Нивното значење во филмската индустрија е особено големо, а меѓу досегашните добитници се бројни светски познати документаристи и оскаровски автори.

Меѓу нив се Асиф Кападија, познат по филмовите „Amy“ и „Senna“, Алекс Гибни, Кевин Мекдоналд, Вернер Херцог, Луј Теру и сер Дејвид Атенборо, како и авторските тимови зад филмовите „No Other Land“, „For Sama“ и „All That Breathes“.

Новиот триумф во Лондон доаѓа по претходните големи успеси на Тамара Котевска, меѓу кои се меѓународниот пробив со „Медена земја“ и неодамнешното освојување на наградата Wildscreen Panda Award, позната и како „Зелен Оскар“.

Со ова признание, Котевска уште еднаш го потврдува своето место на меѓународната документарна сцена, а „Приказната за Силјан“ продолжува да привлекува внимание и да освојува признанија на најзначајните светски филмски настани.

По добивањето на наградата, режисерката истакна дека вредноста на филмот продолжува да се потврдува и по една година исполнета со признанија.

„Вредноста на „Приказната за Силјан“ продолжува да се потврдува и по цела една година исполнета со награди, а ние очекуваме уште многу нови признанија и во наредниот период. Искрено, немам и што повеќе да кажам со зборови, освен дека овој филм го носи моето срце и целата моја страст кон седмата уметност“, изјави Котевска.