НОВ УДАР ВРЗ СЕМЕЈНИТЕ БУЏЕТИ Струјата може да поскапи, Владата најавува граница од 5 проценти
Владата подготвува нов енергетски модел со кој треба да се зголеми домашното производство и да се ублажи ценовниот удар.
Струјата во Македонија би можела да поскапи, но Владата очекува зголемувањето да биде ограничено на најмногу 5 проценти.
Ова го најави премиерот Христијан Мицкоски на брифинг со новинарите, посочувајќи дека се подготвува нов енергетски модел чија цел е зголемување на домашното производство на електрична енергија и намалување на зависноста од ценовните движења на европските пазари.
Според Мицкоски, целта е да се спречи поголем ценовен удар врз домаќинствата, иако енергетските услови во Европа стануваат сè понеповолни.
Европскиот енергетски пазар се соочува со сериозен притисок поради ниските резерви на природен гас, намаленото производство на електрична енергија од хидроцентралите и растечката побарувачка.
Дополнителен притисок создава и забрзаниот развој на центрите за податоци и технологиите за вештачка интелигенција, кои бараат сè поголеми количества електрична енергија.
Во такви услови, Владата се обидува преку зголемување на домашното производство да го ограничи влијанието на европските ценовни шокови врз домашниот пазар.
