ВОЗАЧИТЕ ДА БИДАТ ОСОБЕНО ВНИМАТЕЛНИ Одрони, влажни коловози и градежни работи на повеќе патишта

Сообраќајот на државните патишта утрово се одвива непречено, но по влажни коловози, информираат од Авто-мото сојузот на Македонија (АМСМ). Интензитетот на сообраќајот надвор од градските средини е умерен, додека на граничните премини од македонска страна нема подолги задржувања за влез и излез од државата.

Од АМСМ апелираат до возачите да ја приспособат брзината на движење, да ја почитуваат поставената сообраќајна сигнализација и да управуваат внимателно, особено на патиштата низ котлините, речните долини и клисурите, каде постои опасност од одрони. Посебна претпазливост се препорачува на делниците: Катланово – Велес; Маврово – Дебар – Струга; Виница – Берово и Кочани – Делчево.

Од 15 април, патниот правец Охрид – Ресен преку Националниот парк Галичица е отворен за сообраќај за сите видови возила со тежина до 3,5 тони.

Поради градежни активности и санации, на повеќе државни и регионални патишта се воведени временски измени на режимот на сообраќај:

• Кичево – Охрид: На автопатот А2, на делницата Пресека – Песочан до клучката Арбиново, од 28 октомври 2026 година е воведен времен режим поради санација на левиот коловоз. Работите ќе траат до завршување на санацијата.
• Гостивар – Кичево: На автопатот А2, кај мостот број 63 на реката Тајмишка, од 30 септември се изведуваат градежни работи, поради што сообраќајот се одвива под времен режим.
• Струга – Дебар: На регионалниот пат Р1201 има времен режим поради реконструкција на инекционата завеса на браната „Глобочица“. Измената ќе трае до завршување на градежните активности.
• Гевгелија – ГП Богородица: Од 24 септември 2026 до 15 април 2027 година е воведен времен режим на автопатот А1. Сообраќајот од исклучувањето за Гевгелија до граничниот премин Богородица се пренасочува на спротивниот коловоз, каде движењето се одвива во две насоки. Времен режим има и на клучката кај Гевгелија.
• Граничен премин Делчево: Поради реконструкција, од 9 септември е воведен времен режим на сообраќај. Граничниот премин функционира непрекинато, а сообраќајот се одвива нормално.
• Штип: На регионалниот пат Р1204, кај мостот на реката Брегалница, од 6 јули се врши санација, при што е воведена времена измена на сообраќајот.
• Косоврасти – Мелнички Мост: На регионалниот пат Р1202 се врши санација на свлечиште, поради што сообраќајот се одвива под времен режим до завршување на работите.
• Прилеп – Битола: Во рамки на изградбата на Коридорот 10Д, сообраќајот се пренасочува по регионалниот пат Прилеп – Битола, на потегот од клучката Лагово до Тополчани.
• Прилеп – Крушево – Сладуево: Поради санација на оштетувања и слегнувања на коловозот, на делницата од Мало Коњари до Кривогаштани е предвидено целосно затворање и пренасочување на сообраќајот согласно поставената сигнализација.
• ГП Блаце – Скопје: На повеќе делници се изведуваат градежни активности, а сообраќајот се одвива според времен режим со соодветна сигнализација.
• Кичево – Охрид: Поради градежни работи на повеќе делници, сообраќајот се одвива со девијации. Се препорачува строго почитување на сигнализацијата и приспособена брзина на движење.

Од АМСМ повторно апелираат до сите учесници во сообраќајот да возат внимателно и да ги почитуваат поставените сообраќајни знаци и ограничувања.