КРАЈ НА ЕДНА ФУДБАЛСКА ЕРА Роналдо ја напушта Португалија

Кристијано Роналдо стави крај на својата репрезентативна кариера и по повеќе од две децении се простува од дресот на Португалија. Зад себе остава неверојатен биланс од 234 настапи и 146 постигнати голови, како и европската титула освоена во 2016 година.

Одлуката на фудбалската легенда предизвика бројни реакции. Премиерот на Португалија, Луис Монтенегру, му се заблагодари за сè што направил за земјата, порачувајќи дека неговиот придонес засекогаш ќе одекнува и дека ќе остане симбол на Португалија во светот.

Емоционални пораки упатија и неговата сестра Елма Авеира, поранешниот соиграч Пепе, со кого одигра 348 натпревари, како и Рио Фердинанд, кој нивната заедничка фудбалска приказна во Манчестер Јунајтед ја опиша со зборовите: „Тоа беше филм, брат“.

Селекторот на Португалија, Жорге Жезус, откри дека направил сè што било во негова моќ за да го убеди Роналдо да не ја завршува репрезентативната кариера. Во разговор за „Канал 11“ призна дека дури и го молел да продолжи да игра за националниот тим.

„Ова е негова одлука. Разговаравме за тоа уште пред првиот повик. Го замолив да остане, дури и го молев да продолжи со мене, бидејќи ми беше потребен покрај мене. Но, морам да ја прифатам неговата одлука“, изјави Жезус.

Селекторот го опиша Роналдо како светска фудбалска икона и симбол на Португалија, нагласувајќи дека неговото влијание врз младите генерации ќе остане огромно.

„Тој засекогаш ќе остане во срцата на португалскиот народ и на репрезентацијата. Нема враќање, но тој засекогаш ќе биде една од најголемите фигури во португалскиот фудбал“, порача Жезус.

Фудбалскиот сојуз на Португалија веќе ја потврди желбата да му оддаде посебна почит на својот легендарен капитен. Претседателот Педро Проенса порача дека вратите на федерацијата секогаш ќе бидат отворени за Роналдо. Сепак, засега нема договор за начинот на кој ќе биде организирано неговото збогување, а самиот фудбалер во овој момент нема намера да одигра проштален натпревар.

Според португалскиот медиум „Обсервадор“, бил планиран и телефонски разговор меѓу Роналдо и селекторот Жезус, со посредство на Проенса, но до него не дошло. Според истиот извор, Роналдо не сакал да комуницира со селекторот и веќе ја соопштил својата одлука дека нема намера да се врати во репрезентацијата.

Со заминувањето на Роналдо завршува едно од најзначајните поглавја во историјата на португалскиот фудбал. 146 голови, 234 настапи и европска круна во 2016 година остануваат зад него како наследство што тешко ќе биде надминато.