СТУДЕНТСКИОТ ОБРОК ПРЕД ПРОМЕНА Мицкоски чека важен одговор

Премиерот Христијан Мицкоски изјави дека Владата понудила ново решение за студентскиот оброк, кое, според него, е значително подобро од постојното. Тој посочи дека на двочасовната средба со студентите се разговарало и за прашањето за јазикот на кој ќе се полага правосудниот испит.

Мицкоски ја оцени средбата како конструктивна, нагласувајќи дека владините претставници детално го образложиле предложеното решение за студентскиот оброк. Според премиерот, и студентите се согласиле дека понудениот модел е подобар од сегашниот, но сè уште се очекува нивниот официјален одговор. Тој објасни дека студентските претставници ветиле дека уште истата вечер ќе достават нацрт-верзија на информацијата што ќе ја споделат со своите колеги, но тоа не се случило.

„Еве денеска е втор ден, се надевам дека денеска ќе ја добиеме таа драфт-верзија којашто ќе ја комуницираат со колегите за тоа што е разговарано на состанокот“, изјави Мицкоски.

Осврнувајќи се на прашањето за полагањето на правосудниот испит, премиерот потврди дека Владата подготвила решение кое ќе биде доставено на разгледување до Венецијанската комисија. Според него, предложениот модел треба да овозможи полагање на испитот на јазикот на кој кандидатот го завршил високото образование, истовремено почитувајќи го принципот на единствен јазик во функционирањето на правосудниот систем.

Мицкоски нагласи дека Владата се обидува да воспостави рамнотежа меѓу јазичните права на кандидатите и принципот на владеење на правото.

Премиерот упати критики и кон политичките партии за кои смета дека се обидуваат да го искористат прашањето за правосудниот испит за создавање етнички поделби. Тој оцени дека во изминатите две децении не било понудено конкретно решение, додека актуелната Влада презела иницијатива за надминување на проблемот.

Според Мицкоски, предложеното решение се темели на принципот „лингва франка“, односно користење еден заеднички јазик во правосудството, што, како што посочи, произлегува од мислењето на Венецијанската комисија за Законот за употреба на јазиците. Премиерот изрази уверување дека владиниот предлог може да обезбеди истовремено почитување на јазичните права и зачувување на функционалноста на правосудниот систем.