ВУЧИЌ ПО ПОРАЗОТ ИЗБУВНА На студентската листа има луѓе кои со години биле во лудница, ги нарече Н1 и Нова С олош

Александар Вучиќ, носител на листата „Александар Вучиќ – Единствена Србија“, по изборниот пораз на неговата политичка опција упати низа остри пораки кон политичките противници, студентското движење и независните медиуми во Србија. Во обраќањето од изборниот штаб на Српската напредна партија (СНС), Вучиќ особено жестоко ги нападна телевизиите Н1 и Нова С, нарекувајќи ги нивните новинари „највалкан олош“ и обвинувајќи ги дека лажеле за секоја изговорена реченица.

„Што се однесува до највалканиот олош од Н1, Нова С и останатите, тие лажеа за секој збор што го изговорија“, рече Вучиќ, додавајќи дека, според него, овие медиуми работеле за интересите на некој друг.

Тој повторно ги спомена и обвинувањата поврзани со употребата на звучен топ за време на протестите во Србија, повикувајќи ги своите противници да го гонат токму по таа основа.

Во продолжението на говорот, Вучиќ упати и сериозни обвинувања кон кандидатите на студентската листа, тврдејќи дека меѓу нив имало лица кои поминале години во психијатриски установи.

„Кај нив на врвот на листата има луѓе кои поминувале време, не сакав да зборувам за тоа, поминувале време и во лудница, и тоа со години“, изјави Вучиќ.

Една од најзначајните политички пораки во говорот на Вучиќ се однесуваше на односите на Србија со Русија и можноста за воведување санкции кон Москва.

„До март или април ќе имате воведени санкции против Руската Федерација“, изјави Вучиќ, алудирајќи на идните потези на новата власт предводена од студентската листа.

Тој ги обвини политичките противници дека за време на кампањата не ги откриле своите вистински намери и дека, според него, по преземањето на власта ќе спроведат политики што досега ги премолчувале.

И покрај острите напади, Вучиќ ѝ честиташе на студентската листа за победата, оценувајќи дека станува збор за политичка промена поддржана од странски фактори. Тој тврдеше дека зад изборниот резултат стојат различни европски земји и делови од американската политичка структура, како што рече длабоката држава. Вучиќ порача дека неговата политичка опција ќе продолжи да се бори и дека нема да предизвикува блокади во процесот на формирање на новиот парламент и владата.

Изборниот резултат, според неговите сопствени проценки, претставува сериозен политички удар за СНС и крај на долгогодишната доминација на Вучиќ во српската политика. Сега останува да се види како новото парламентарно мнозинство ќе ја формира владата и каква политика ќе води кон Европската Унија, Русија и останатите меѓународни партнери.