(ВИДЕО) ВУЧИЌ ГО ПРИЗНА ПОРАЗОТ, ПА ИМ СЕ ЗАКАНИ НА СТУДЕНТИТЕ До март или април ќе воведете санкции кон Русија

Александар Вучиќ призна дека неговата политичка листа претрпела пораз на предвремените парламентарни избори во Србија, оценувајќи дека победата ѝ припаднала на Студентската листа, произлезена од двегодишните студентски протести.

Обраќајќи се пред јавноста, Вучиќ рече дека, според прелиминарните податоци од стратифициран примерок, студентската листа би можела да освои меѓу 135 и 140 пратенички места, додека неговата коалиција би добила околу 105 мандати.

„Врз основа на стратифицираниот примерок, јасно е дека ги загубивме овие избори. Победи листата на студентите-блокатори“, изјави Вучиќ, додавајќи дека конечните резултати сè уште не се објавени.

Тој рече дека е горд на она што го направила неговата политичка опција и најави дека ќе продолжи политичката борба, и покрај изборниот пораз.

Една од најострите пораки на Вучиќ беше упатена кон победниците на изборите, за кои тој тврди дека во иднина ќе ја сменат надворешната политика на Србија и ќе воведат санкции кон Москва.

„Она што ме загрижува, да ви кажам веднаш: до март или април ќе воведете санкции кон Руската Федерација. Ќе направат сè што не сакаа да ви кажат, сè за што излажаа“, рече Вучиќ.

Тој ги обвини студентите дека се само извршители на политички планови осмислени надвор од Србија, тврдејќи дека изборниот резултат е последица на странска поддршка и обид за уривање на суверенитетот на земјата. Вучиќ ги спомена и европските земји и, како што рече, „длабоката американска држава“, за која тврдеше дека стои зад политичките процеси во Србија.

По признавањето на поразот, Вучиќ порача дека нема намера да ја напушти земјата и дека нема да се кандидира на други избори.

„Нема да се кандидирам никаде, во Србија сум, без разлика што. Толку за непризнавањето на изборите“, изјави тој.

Истовремено, најави дека неговата политичка опција веднаш ќе започне со подготовките за следните политички битки.

„Ќе видите сè за шест месеци“, порача Вучиќ, додавајќи дека неговата партиска структура останува силна и покрај тоа што дел од поддржувачите би можеле да ја напуштат.

Тој на победниците им посака успех, но истовремено ја доведе во прашање нивната самостојност, тврдејќи дека зад нив стои значителна надворешна поддршка.

Во обраќањето, Вучиќ ја спомена и Наташа Кандиќ, основачка на Фондот за хуманитарно право, оценувајќи дека нејзината политика победила благодарение на голема поддршка од странство. Тој упати остри критики и кон телевизиите N1 и Nova S, обвинувајќи ги дека ширеле невистини и учествувале во, како што ја нарече, валкана политичка кампања против него. Вучиќ повторно го отвори и прашањето за звучниот топ, околу чие наводно користење за време на протестите во Србија имаше јавни полемики и барања за истрага.

И покрај острите обвинувања кон политичките противници, Вучиќ рече дека не очекува улични немири и судири по изборите.

„Ние никогаш не го сакавме тоа, за разлика од нив“, изјави тој.

Изборниот резултат отвора ново поглавје во политиката на Србија, но останува да се види дали Студентската листа ќе успее да го претвори изборниот успех во стабилно парламентарно мнозинство и дали најавите за промени во надворешната политика ќе се претворат во конкретни одлуки.