МИЦКОСКИ СО СИЛНА ПОРАКА ПО ИЗБОРИТЕ ВО БРВЕНИЦА – СДСМ декласиран, ВМРО-ДПМНЕ слави убедлива победа
Премиерот Христијан Мицкоски објави убедлива победа на ВМРО-ДПМНЕ во првиот круг од локалните избори во Брвеница, оценувајќи дека граѓаните испратиле јасна порака до опозицијата. Најави нови инвестиции и побара широка поддршка во вториот круг на 1 ноември.
ВМРО-ДПМНЕ оствари убедлива победа во првиот круг од локалните избори во Брвеница, соопшти синоќа премиерот и лидер на партијата, Христијан Мицкоски, оценувајќи дека изборниот резултат претставува силна потврда за довербата на граѓаните во политиките на партијата и Владата.
Мицкоски упати остра политичка порака до СДСМ, посочувајќи дека резултатите на терен се сосема спротивни од најавите на опозициската партија.
„Иако само пред неколку дена раководството на СДСМ најавуваше убедлива победа во Брвеница, сепак СДСМ е декласиран од граѓаните и тоа е важна порака од граѓаните до нивното раководство“, изјави Мицкоски.
Според податоците што ги презентираше лидерот на ВМРО-ДПМНЕ, кандидатот на ДУИ се пласирал на второто место со нешто повеќе од 2.100 гласа, трет завршил кандидатот на ВЛЕН, додека кандидатот на СДСМ е четврти. Независниот кандидат поддржан од Левица, според Мицкоски, освоил околу 50 гласа.И покрај убедливото водство, Мицкоски посочи дека поради поголемиот број кандидати, најверојатно ќе биде потребен втор круг на гласање, закажан за 1 ноември.
Тој им се заблагодари на граѓаните за учеството во изборниот процес, нагласувајќи дека нивната волја мора да биде почитувана и дека изборната победа носи сериозна одговорност.
Мицкоски најави нови инвестиции во Брвеница
Премиерот порача дека Владата ќе продолжи со вложувањата во локалниот развој, со посебен акцент на инфраструктурата и подобрувањето на секојдневниот живот на граѓаните.
„Владата ќе продолжи да вложува во развојот на општините. Во патишта, водоводи, училишта, комунална инфраструктура и во создавање подобри услови за живот. Тоа важи и, се разбира, за Брвеница“, истакна Мицкоски.
Во пресрет на вториот круг, тој најави дека ВМРО-ДПМНЕ ќе побара поддршка од сите жители на Брвеница, ветувајќи конкретни проекти, решавање на комуналните проблеми, подобра инфраструктура и повеќе перспективи за младите.
Мицкоски нагласи дека идниот градоначалник мора да биде градоначалник на сите граѓани, без разлика на нивната етничка, верска или политичка припадност.
„Победата е огромна, но и нашите обврски за оваа општина се огромни. Со конкретни проекти, со одговорност, со почит кон секој човек. За една Брвеница за сите“, порача Мицкоски.
