ХАОС ВО ФРАНЦИЈА До 500 училишта затворени, илјадници приведени во бран студентски протести

До 500 училишта низ Франција во понеделник се целосно или делумно затворени поради бранот студентски протести што ја зафати земјата.

Министерот за образование Едуар Жефри изјави дека наставата ќе биде прекината во околу 400 до 500 средни училишта, бидејќи не се исполнети безбедносните услови. Тој додаде дека од почетокот на протестното движење 24 училишта биле запалени или ограбени, а повредени се и 78 наставници.

Најголем удар има во регионот Ил де Франс, каде што повеќе од една третина од 468 училишта околу Париз во понеделник ќе бидат затворени.

Протестите започнаа на 17 септември во Париз, но во текот на изминатата недела се проширија низ цела Франција. Средношколците протестираат поради недостиг на наставници, дотраени училишни објекти и други проблеми во образованието.

Ситуацијата дополнително се вжешти со судири меѓу учениците и полицијата, при што биле употребени солзавец и палки.

Организаторите најавија нови масовни демонстрации во вторник, обвинувајќи ја владата дека не понудила доволно конкретни мерки. Премиерот Себастијан Лекорну најави план за пополнување на слободните работни места во училиштата и состанок со регионалните лидери за обновување на дотраените училишни згради.

Во меѓувреме, бројот на приведени од почетокот на протестите надмина 5.000 лица, од кои околу 85 проценти се малолетници.

Случаите на насилство продолжуваат да ја зголемуваат тензијата. Во еден од последните инциденти, 16-годишник е приведен под сомнение дека нападнал наставник, додека во друг случај група млади во Белфорт била снимена како претепува полицаец.

Амнести интернешнл го критикуваше, како што го опиша, „несразмерното полициско насилство“, додека министерот за внатрешни работи Лоран Нуњез тврди дека безбедносните сили ги штитат младите кои мирно ги изразуваат своите барања.