МИЦКОСКИ ДО СДСМ Вие броевте 50, нашата делегација беше двојно помала
Премиерот ги отфрли критиките за бројноста на делегацијата и објасни зошто повеќе министри присуствувале на различни настани.
Премиерот Христијан Мицкоски ги отфрли обвинувањата од СДСМ за бројноста на владината делегација во Њујорк, посочувајќи дека во времето на владите на СДСМ и ДУИ делегациите биле значително побројни.
Говорејќи во емисијата „Под лупа“ на ТВ „Алфа“, Мицкоски рече дека критиките се резултат на тоа што претходните влади испраќале многу поголеми делегации.
„Тоа е Фројд, бидејќи тие оделе така и сега мислат дека сите одат така“, рече Мицкоски.
Тој додава дека за време на Генералното собрание на ОН во Њујорк во еден период присуствувале и тогашниот претседател Стево Пендаровски и премиерот Димитар Ковачевски.
Според него, тогаш делегациите можеле да бројат и околу 50 лица, додека актуелната делегација била значително помала од таа бројка, можеби и помалку од половина.
Мицкоски објасни дека учеството на повеќе членови на Владата било поврзано со различните активности и настани што се одржувале паралелно со Генералното собрание на ОН.
„На една група настани беше министерот Сали, на друга група настани беше министерот Муцунски. Паралелно со ова се одвиваа и економски настани настрана од Генералното собрание на Обединетите нации, па беше дојдена и министерката за финансии“, посочи премиерот.
Мицкоски нагласи дека Генералното собрание на ОН е значаен меѓународен настан кој се одржува еднаш годишно и за кој, според него, е потребна соодветна логистика и присуство на повеќе претставници на Владата.
