СЕДЛОСКИ ЈА НАЛУТИ СТАТИСТИКАТА Овие ѕвезди гостувале во Скопје, а не победиле

Македонската фудбалска репрезентација синоќа доживеа убедлив пораз од 0:3 од Швајцарија на стартот од новата сезона во Лигата на нации. Резултатот е разочарувачки, но уште позагрижувачки е начинот на кој Македонија изгледаше на теренот.

Нашата репрезентација не упати ниту еден удар во рамките на голот на Швајцарија, додека гостите создадоа низа сериозни шанси. Столе Димитриевски со неколку одлични интервенции спречи поразот да биде уште поубедлив.

Токму затоа останува впечатокот дека Македонија одамна не изгледала толку инфериорно на домашен терен.

По натпреварот, селекторот Гоце Седлоски изјави дека Швајцарија е „најсилната репрезентација која гостувала во Скопје“. Но, оваа констатација тешко може да се потврди ако се погледне историјата на натпреварите што Македонија ги одиграла пред својата публика.

Седлоски, кој како фудбалер е еден од само двајцата Македонци со повеќе од 100 настапи за националниот тим, веројатно бил импресиониран од силата на Швајцарците. Сепак, во изминатите три децении на скопската арена гостувале репрезентации со состави преполни со светски ѕвезди.

А против некои од нив Македонија не само што не била надиграна, туку успевала и да освојува бодови.

Англија со Бекам, Тери, Лампард и Руни – само 2:1 во Скопје

Во 2003 година во Скопје гостуваше една од најсилните генерации на Англија. Во составот беа Дејвид Бекам, Џон Тери, Френк Лампард, Мајкл Овен, Вејн Руни, Сол Кембел, Гери Невил, Енди Кол и Дејвид Џејмс.

Англичаните победија со 2:1, а токму Вејн Руни го постигна својот прв гол во репрезентативниот дрес.

Но, Англија повторно гостуваше во Скопје во ноември 2023 година. Тогаш Македонија одигра 1:1 против селекција во која настапија Букајо Сака, Фил Фоден, Џек Грилиш, Трент Александер-Арнолд, Деклан Рајс, Кол Палмер, Маркус Рашфорд, Хари Мегваер, Кајл Вокер и Оли Воткинс.

Холандија дојде со ван дер Сар, Давидс и Снајдер – Македонија даде два гола

Во 2004 година во Скопје гостуваше Холандија, исто така со исклучително силен состав.

Едвин ван дер Сар, Едгар Давидс, Марк ван Бомел, Весли Снајдер, Филип Коку, Пјер ван Хојдонк, Дирк Кајт и Најџел де Јонг беа дел од холандската селекција.

И покрај огромниот квалитет на гостите, Македонија одигра 2:2 и освои голем бод.

Актуелниот европски шампион Данска не успеа да победи во Скопје

Уште во 1994 година, на самиот почеток од македонската репрезентативна историја, во Скопје гостуваше Данска – актуелниот европски шампион.

Во составот на Данците беа легендарните Питер Шмајхел, Михаел Лаудруп и Брајан Лаудруп, како и Ким Вилфорт, Ларс Олсен и Томас Хелвег.

Натпреварот заврши 1:1.

Германија со Нојер, Милер, Кимих и Гнабри победи со 4:0

Германија е една од ретките репрезентации што во поновата историја успеа убедливо да слави во Скопје.

Во 2021 година, „панцерите“ дојдоа со Мануел Нојер, Каи Хаверц, Томас Милер, Серж Гнабри, Џошуа Кимих, Леон Горецка и Тимо Вернер и победија со 4:0.

Сепак, само неколку месеци претходно Македонија ја шокираше Германија и славеше со 2:1 во Дуизбург.

Шпанија, Италија, Белгија, Русија… Швајцарија не е единствената суперсила

На „Тодор Проески“ низ годините гостувале и Шпанија, Италија, Белгија, Русија и уште низа европски репрезентации со огромен фудбалски квалитет.

Затоа, тврдењето дека Швајцарија е најсилната селекција што некогаш гостувала во Скопје тешко се вклопува во историјата на македонската репрезентација.

Можеби вистинското прашање е поинакво: дали Македонија денес е послаба од генерациите кои успеваа да им парираат на најголемите европски репрезентации?

Синоќешниот натпревар покажа дека разликата меѓу Македонија и Швајцарија во моментот била огромна. А дополнителен проблем е што Македонија продолжува со негативната серија во нападот.

Следниот предизвик е гостувањето кај Словенија, каде Македонија ќе има нова шанса да ја прекине црната серија од повеќе од 500 минути без постигнат гол.