ВОЗАЧИ, ВНИМАВАЈТЕ Овие патишта денес се под посебен режим – еве каде има одрони и девијации
Сообраќајот генерално се одвива без поголеми проблеми, но АМСМ предупредува на внимателно возење на повеќе критични делници низ Македонија
Сообраќајот на државните патишта утрово се одвива непречено, главно по суви коловози. Интензитетот на сообраќајот надвор од градските средини е умерен, додека на граничните премини од македонска страна нема подолги задржувања за влез и излез од државата.
Од АМСМ апелираат возачите да ја прилагодат брзината, да ја почитуваат поставената сигнализација и да бидат особено внимателни на патиштата низ котлини, речни долини и клисури, каде постои можност од појава на одрони.
Особено внимание се препорачува на делниците Катланово – Велес, Маврово – Дебар – Струга, Виница – Берово и Кочани – Делчево.
Времен режим на повеќе патни правци
Поради градежни и санациски активности, на повеќе делници низ земјава е воспоставен времен режим на сообраќај.
На граничниот премин Делчево, поради реконструкција, од 9 септември е воведен времен режим. Од АМСМ информираат дека преминот ќе функционира непрекинато, а сообраќајот ќе се одвива нормално во текот на градежните работи.
На автопатот А4, делница Миладиновци – Свети Николе – Штип, кај наплатната станица Преод, до 1 октомври ќе има изменет режим поради санација на косина.
Во Штип, од 6 јули трае времената измена на сообраќајот поради санација на мостот на реката Брегалница на патот Р1204.
Ограничувања и санации кај Гостивар и Желино
На државниот пат А2, делница Гостивар – Стража, се изведуваат санации на мостовите, меѓу кои мостот бр. 4 – Вијадукт на Атанасова Река и мостот бр. 7 – Вијадукт на Дол. Поради работите е воспоставен времен режим на сообраќај.
Времен режим има и на мостовите на А2 на реката Вардар кај село Желино, во двата правци – Скопје–Желино и Желино–Скопје.
На автопатот А1, делница Смоквица – Гевгелија, се изведуваат активности за поставување интерконективен гасовод под автопатот, поради што е поставена соодветна сигнализација за времен режим.
Внимателно на скопската обиколница
На државниот пат А2 – скопска обиколница, се врши рехабилитација на делница во должина од околу 250 метри, од клучката Волково до клучката Кондово.
Поради работите затворена е левата сообраќајна лента за претекнување, а сообраќајот се одвива по средната лента и лентата за принудно запирање. Возачите се повикуваат да ја почитуваат поставената сигнализација.
Свлечишта и девијации на други делници
На регионалниот пат Р1202 Косоврасти – Мелнички Мост продолжуваат работите на санација на свлечиште, поради што е воспоставен времен режим на сообраќај.
Во рамки на изградбата на Коридор 10Д, на патниот правец Прилеп – Битола движењето се пренасочува по регионалниот пат, на потегот од клучката Лагово до Тополчани.
На Кичево – Охрид (А2), поради градежни работи на повеќе делници, сообраќајот се одвива со девијации. АМСМ апелира на строго почитување на сигнализацијата и прилагодена брзина.
Сообраќај низ Јасен
За движењето низ Јасен на релацијата Скопје – Македонски Брод важат утврдените временски интервали:
- Скопје – Македонски Брод: 07:30-09:00, 12:00-12:45 и 16:00-18:00 часот
- Македонски Брод – Скопје: 06:00-07:00, 10:30-11:00, 13:00-13:45 и 18:30-20:00 часот
Воедно, патниот правец Охрид – Ресен преку Галичица е отворен за сообраќај за сите видови возила до 3,5 тони.
