ПО ОСТАВКАТА – ВО ПАРИЗ Украинскиот државен обвинител ја напуштил земјата среде истрага
Руслан Кравченко заминал на петдневно службено патување, но неговото име не се наоѓа меѓу учесниците на настанот на ПССЕ.
Украинскиот државен обвинител Руслан Кравченко, кој неодамна поднесе оставка во време на нова истрага на антикорупциските власти, синоќа ја напуштил Украина и отпатувал за Париз, објавува „Украинска правда“.
Според информациите на украинскиот весник, Кравченко заминал на наводно петдневно службено патување во француската престолнина. Во копија од наредбата за патувањето се наведува дека тој треба да учествува на настан организиран во рамки на Парламентарното собрание на Советот на Европа.
Сепак, „Украинска правда“ тврди дека името на Кравченко не се наоѓа на официјалниот список на учесници на настанот.
Весникот објавува и дека Кравченко ја преминал украинската граница со службен автомобил во 2:30 часот по локално време.
Неговото заминување од земјата доаѓа во период кога Кравченко неодамна поднесе оставка на функцијата државен обвинител, поради нова истрага што ја водат антикорупциските власти.
