ЗА ИЗБОРИ СМЕ СПРЕМНИ УШТЕ УТРЕ Ама нема да бидеме алиби на Мицкоски

Претседателот на СДСМ, Венко Филипче, порача дека СДСМ е подготвен за избори, дури и тие да се одржат веднаш, но нема да биде алиби на Христијан Мицкоски за неговите политички калкулации.

„Нема да бидеме алиби за предвремени избори на премиерот Христијан Мицкоски. Очигледно е дека единствениот параметар што него го тера да бара избори е тоа што повеќе нема пари во буџетот за неговите криминални тендери. Сега нема ни од каде да се задолжува така лесно, затоа што неговиот ментор Орбан веќе не е на власт, нема од каде да зема кинески пари. Ние за избори сме спремни. Утре да се случуваат, за утре сме спремни за изборите, и со тимот и со програмата, со мастер-планот за Македонија и договорот со граѓаните којшто ќе го презентирам во текот на септември“, рече Филипче на денешната прес-конференција.

Тој најави дека програмата на СДСМ ќе биде јасно дефинирана, со конкретни приоритети, за граѓаните да знаат за што ќе гласаат кога и да се одржат следните избори.

„Шест точки, јасно и добро дефинирани да знаат граѓаните за што ќе гласаат кога и да се случат следните избори. Сите најважни аспекти во однос на иднината на државата, во однос на зајакнувањето на системот, во однос на благосостојбата на граѓаните во оваа социјална држава којашто сега е ставена по страна ќе бидат јасно гласно напишани и објаснети“, потенцираше претседателот на СДСМ.

Филипче нагласи дека СДСМ нема да биде алиби за Мицкоски за предвремени избори, посочувајќи дека премиерот има двотретинско мнозинство и може сам да донесе одлука за распишување избори.

„За избори сме спремни кога и да бидат. Ама нема да бидеме алиби. Христијан Мицкоски има две третини во Собранието, апсолутна власт. Може да распише избори кога сака. Зошто му е СДСМ сега? Зошто му е? Не навлегуваме во таа игранка. Човекот ќе распише избори кога повеќе нема да има пари, а пари снемуваат сè повеќе и повеќе“, потенцираше Филипче.