СИЉАНОВСКА МУ ДАДЕ ПОДДРШКА НА ЌУРА Еве што порача од Струга

Симболично, токму на 25-годишнината од потпишувањето на Рамковниот договор, претседателката Гордана Сиљановска-Давкова ја посети Струга, каде што оствари средба со градоначалникот Менди Ќура, независен кандидат поддржан од граѓани со различна партиска, етничка и верска припадност.

Претседателката оцени дека Ќура има можност да води локална политика која ќе обединува и ќе биде насочена кон интересите на сите граѓани. На средбата тој ја запозна со тековните активности во општината, но и со најголемите предизвици со кои се соочува Струга.

Сиљановска-Давкова разговараше и со претседателот на Советот на Општина Струга, Мите Стефоски. Таа истакна дека средбата ја уверила во нивната подготвеност за решавање на реалните проблеми на граѓаните, но и за преземање сериозни мерки за заштита на природното и културното наследство под заштита на УНЕСКО.

„Струга, Охрид, Охридското Езеро и целиот регион се наше заедничко богатство. Тие ја заслужуваат и локалната и државната посветеност, грижа и одговорност“, порача претседателката.