ЗАЛИВОТ Е МЕКСИКАНСКИ А НЕ АМЕРИКАНСКИ Мексико го тужи Google
Мексиканската влада инсистира дека секоја промена на името треба да биде договорена преку меѓународни канали и дека едностраното именување е правно и политички неприфатливо.
Владата на Мексико поднесе тужба против технолошкиот гигант Google, обвинувајќи го за неприфатлива промена на името на Мексиканскиот Залив во „Американски Залив“ на платформата Google Maps.
Како што соопшти мексиканската претседателка Клаудија Шајнбаум, тужбата е веќе поднесена, иако не откри конкретни детали околу местото и времето на поднесувањето. Според неа, промената е базирана врз извршната наредба на поранешниот американски претседател Доналд Трамп.
„Ова е прашање на суверенитет и историска точност“, изјави Шајнбаум. „Не можеме да дозволиме приватна компанија да подлегне на еднострани политички одлуки и да ги менува географските реалности.“
Тензии меѓу двете земји се засилија по усвојувањето на контроверзен закон во Претставничкиот дом на САД, со кој се потврдува извршната наредба на Трамп од јануари годинава. Со 211 гласа „за“ и 206 „против“, законот наиде на поддршка само од републиканците, со исклучок на еден пратеник – Дон Бејкон од Небраска. Иницијативата беше предводена од контроверзната пратеничка Марџори Тејлор Грин.
Законот бара сите федерални институции да го користат терминот „Американски Залив“ во официјалните документи и мапи. Сепак, неговото понатамошно усвојување во Сенатот останува неизвесно, бидејќи ќе биде потребна поддршка и од демократите.
Министерството за надворешни работи на Мексико претходно испрати официјално писмо до Google, со барање да не ги прикажува мексиканските територијални води под новото име. Во одговор, потпретседателот на компанијата за владини работи и јавна политика посочил дека Google нема намера да ја ревидира својата политика.
Во моментов, Google Maps прикажува различни ознаки во зависност од локацијата на корисникот: „Американски Залив“ во рамките на САД, „Мексикански Залив“ во Мексико и „Мексикански Залив (Американски Залив)“ на други места во светот.
Мексиканската влада инсистира дека секоја промена на името треба да биде договорена преку меѓународни канали и дека едностраното именување е правно и политички неприфатливо.
