МОСКВА СО УЛТИМАТУМ ДО ЕРЕВАН До декември мора да изберат – ЕУ или Евроазиската унија
Русија бара референдум во Ерменија, а доколку нема одлука, иднината на земјата во ЕАЕУ ќе биде тема на декемврискиот самит.
Русија бара Ерменија до декември да се изјасни за својата иднина и дали ќе продолжи да биде дел од Евроазиската економска унија (ЕАЕУ) или ќе го следи европскиот курс кон Европската унија. Заменик-министерот за надворешни работи на Русија, Михаил Галузин, изјави дека на декемврискиот состанок на Врховниот Евроазиски економски совет лидерите на земјите членки ќе ја разгледаат идната позиција на Ерменија и влијанието на нејзиниот европски курс врз членството во ЕАЕУ.
Галузин потсети дека претседателите на Русија, Белорусија, Казахстан и Киргистан на 29 мај заеднички ја повикале Ерменија што поскоро да одржи национален референдум на кој граѓаните би се изјасниле дали сакаат членство во ЕУ или останување во ЕАЕУ.
Според него, доколку до декември не биде прифатен повикот за референдум, лидерите на ЕАЕУ ќе го земат предвид тоа при определувањето на понатамошните чекори.
Рускиот функционер оцени дека изјавите на ерменскиот премиер Никол Пашинјан за можен референдум се контрадикторни. Пашинјан, пак, на 7 август изјави дека во моментов нема услови за организирање референдум бидејќи, како што рече, „нема тема за референдум“. Тој смета дека граѓаните треба да се изјаснат откако Ереван официјално ќе се обрати до ЕУ и ќе добие појасна перспектива за евентуално членство.
Москва претходно предупреди дека Ерменија не може истовремено да биде членка на ЕАЕУ и на ЕУ. Рускиот претседател Владимир Путин објасни дека причината е различното царинско и трговско уредување на двете организации.
Ерменија може да го загуби правото на глас во ОДКБ
Дополнителен проблем во односите меѓу Москва и Ереван е учеството на Ерменија во Организацијата на договорот за колективна безбедност (ОДКБ). Ерменија повеќе од две години го замрзнува своето учество во работата на организацијата и не плаќа членарина. Галузин предупреди дека, според статутот на ОДКБ, членка која две години не ги подмирува финансиските обврски може да биде лишена од правото на глас, како и од можноста да номинира свои кандидати за позиции предвидени за националните квоти.
Прашањето за евентуално одземање на правото на глас на Ерменија би можело да се разгледува веќе на следната седница на Советот за колективна безбедност, која е закажана за 11 ноември во Москва. Галузин нагласи дека одлуката на Ереван да го замрзне учеството во ОДКБ не ја ослободува земјата од финансиските обврски кон организацијата.
