ММФ ЈА ОТВОРИ КАСАТА ЗА КИЕВ Украина добива нова транша од 690 милиони долари
По завршениот преглед на исполнувањето на условите од кредитната програма, ММФ одобри итна исплата на нова транша за Украина, додека Киев продолжува да се потпира на странска финансиска помош за покривање на големиот буџетски дефицит.
Меѓународниот монетарен фонд (ММФ) одобри нова транша финансиска помош за Украина во рамки на актуелната кредитна програма, пренесува РИА Новости.
Извршниот одбор на ММФ го заврши првиот преглед на исполнувањето на условите од 48-месечната продолжена програма за финансирање на Украина, со што е овозможена итна исплата на нова транша во вредност од 690 милиони американски долари.
Украина веќе неколку години се соочува со висок буџетски дефицит и значително се потпира на странска финансиска помош за негово покривање. Буџетот за оваа година е проектиран со дефицит од 1,9 трилиони гривни, што е околу 45 милијарди долари.
Киев продолжува да бара финансиска поддршка од странство за покривање на буџетските потреби. Во исто време, западните партнери сè почесто водат долги дискусии пред одобрувањето на новите пакети помош и укажуваат дека Украина треба да ги засили напорите за обезбедување сопствени извори на финансирање.
