АМСМ СО ВАЖНО ПРЕДУПРЕДУВАЊЕ На овие патни делници возете особено внимателно

Сообраќајот на државните патишта во Македонија се одвива непречено по суви коловози. Интензитетот на сообраќајот надвор од градските средини е умерен, а на граничните премини од македонска страна нема подолги задржувања за влез и излез од државата.

АМСМ апелира до возачите да ја прилагодат брзината на условите на патот, да ја почитуваат сообраќајната сигнализација и да бидат особено внимателни на делниците низ клисури, котлини и речни долини, каде постои опасност од одрони. Поголема претпазливост се препорачува на патните правци Катланово – Велес, Маврово – Дебар – Струга, Виница – Берово и Кочани – Делчево

Патниот правец Охрид – Ресен преку Националниот парк Галичица е отворен за сообраќај за сите возила со вкупна маса до 3,5 тони. До 31 август важи сезонска забрана за движење на тешки товарни возила со вкупна маса над 15 тони:

• Петок: 17:00 – 22:00 часот
• Сабота: 09:00 – 18:00 часот
• Недела: 09:00 – 22:00 часот

Во денови со екстремно високи температури, забраната важи и од понеделник до четврток, од 11:00 до 17:00 часот, доколку тоа го утврди Министерството за здравство. Ограничувањето не важи за возила што превезуваат живи животни, цвеќе, хуманитарна помош, жито и житни култури, леснорасиплива стока, нафта и нафтени деривати, опасни материи, како и за возила ангажирани на државни патни проекти.

До 1 септември на магистралниот пат А2 (Скопје – Охрид – Скопје) е во сила дополнителна забрана за товарни возила над 7,5 тони:

• Петок: 15:00 – 22:00 часот
• Сабота: 07:00 – 12:00 и 18:00 – 24:00 часот
• Недела: 07:00 – 22:00 часот

Мерката е воведена за побрз проток на сообраќајот кон Охрид во текот на летната туристичка сезона.

На повеќе патни правци низ државата се изведуваат градежни работи и санации, поради што е воведен времен режим на сообраќај:

• санација на мост на реката Брегалница на регионалниот пат Р1204 кај Штип;
• санација на вијадукти на делницата Гостивар – Стража (А2);
• санација на мостовите на реката Вардар кај Желино на автопатот А2;
• изградба на премин за интерконективниот гасовод под автопатот А1, на делницата Смоквица – Гевгелија;
• рехабилитација на дел од скопската обиколница меѓу клучките Волково и Кондово, каде сообраќајот се одвива по две ленти;
• санација на свлечиште на регионалниот пат Косоврасти – Мелнички Мост;
• времен режим на сообраќај на патниот правец Прилеп – Битола поради изградбата на Коридорот 10Д, со пренасочување на возилата по регионалниот пат од клучката Лагово до Тополчани.