ВАШЕТО ЛИЦЕ МОЖЕ ДА СТАНЕ ДЕЛ ОД AI СЛИКА БЕЗ ДА ОЧЕКУВАТЕ Мета отвори голема дебата

Meta го претстави Muse Image, новиот AI модел за креирање слики кој е развиен во рамките на нејзиниот оддел Superintelligence Labs. Технологијата веќе е достапна во апликацијата Meta AI, како и на Instagram и WhatsApp, а во следниот период се очекува да биде интегрирана и во Facebook и Messenger.

Muse Image е дел од новата генерација Muse AI модели со кои компанијата постепено планира да ги замени постојните Llama модели. Според Meta, новата технологија има напредни „агенциски“ способности и пред да создаде слика, таа може да го анализира барањето на корисникот, да собира дополнителни информации и да направи план за креирање на посакуваната содржина.

Од компанијата велат дека овој пристап овозможува поквалитетни и попрецизни резултати, бидејќи вештачката интелигенција не се потпира само на внесен текст, туку се обидува да го разбере контекстот зад барањето. Muse Image може да работи и со јазичниот модел Muse Spark, додека паралелно се развива и Muse Video за создавање видео содржини.

Сепак, најмногу реакции предизвика можноста корисниците во промптот да означат јавен Instagram профил и да побараат AI да ја искористи таа личност во нова генерирана слика.

Доколку корисникот наведе друг јавен профил, Meta AI може да ги користи јавно достапните фотографии за да создаде визуелна претстава на лицето и изгледот на личноста и да ја вметне во нова дигитална сцена. Токму оваа функција предизвика дебати за границите на приватноста и можните злоупотреби.

Meta наведува дека сопствениците на профилите ќе можат да контролираат дали нивните јавни фотографии ќе смеат да се користат за вакви AI креации. Сепак, критичарите предупредуваат дека самата можност нечиј изглед да биде искористен за создавање нови слики без директно барање од лицето може да создаде нови ризици.

Освен работата со лица, Muse Image нуди и низа други креативни алатки. Корисниците ќе можат да уредуваат фотографии, да создаваат покани, честитки и различни визуелни материјали, како и да добиваат предлози за преуредување на простории со помош на AI.

Новата алатка овозможува и прецизно уредување на одредени делови од фотографијата. Корисникот може да означи дел од сликата кој сака да го промени, а вештачката интелигенција ќе изврши корекција според дадениот опис.

Создадените слики ќе можат директно да се споделуваат на Instagram, преку Stories или во приватни разговори. Muse Image ќе биде основа и за околу 30 нови AI ефекти кои наскоро треба да пристигнат во Instagram Stories.