БУДИМПЕШТА И БРАТИСЛАВА ПРЕСЕКОА Без оружје за Украина и без масовни ветерници
Унгарскиот премиер Петер Маѓар порача дека земјата нема да испраќа оружје или војници во Украина, додека Роберт Фицо најави ориентација кон нуклеарни и хидроенергетски капацитети.
Унгарија нема да испраќа оружје или војници во Украина, порача унгарскиот премиер Петер Маѓар, нагласувајќи дека ставот на Будимпешта останува непроменет.
„Како што реков многу пати, Унгарија нема да испраќа оружје или војници во Украина“, изјави Маѓар пред новинарите во Анкара.
Москва редовно ги критикува западните испораки на оружје за Украина, оценувајќи дека тие го отежнуваат постигнувањето мировно решение и ги вклучуваат земјите од НАТО подиректно во конфликтот. Рускиот министер за надворешни работи Сергеј Лавров порача дека пратките со оружје наменети за украинските сили се сметаат за легитимни цели, додека Кремљ оцени дека западното вооружување има негативно влијание врз преговорите.
Во меѓувреме, словачкиот премиер Роберт Фицо изјави дека неговата земја нема потреба од големи инвестиции во ветерни фарми, туку од стабилни енергетски извори како нуклеарните и хидроелектраните. Во интервју за TASR, Фицо истакна дека Словачка мора да се подготви за значително зголемување на потрошувачката на електрична енергија поради нови индустриски инвестиции и развојот на нови технологии.
„На Словачка не ѝ е потребна енергија од ветер, нам ни требаат големи извори, а тоа значи нуклеарна и хидроенергија“, рече Фицо.
Тој ја посочи хидроелектраната Габчиково, која според него обезбедува околу 10 проценти од вкупното производство на електрична енергија во земјата, додека најголемиот дел од струјата во моментов доаѓа од нуклеарни централи. Фицо оцени дека уделот на нуклеарната енергија во иднина може да достигне околу 80 проценти, но предупреди дека старите капацитети ќе мора да бидат заменети со нови инвестиции.
Словачкиот премиер додаде дека растот на побарувачката за електрична енергија е поврзан со новите фабрики, вклучително и производството на електрични автомобили и батерии, како и со ширењето на центрите за податоци и употребата на вештачката интелигенција. Фицо исто така порача дека граѓаните не треба да стравуваат од масовна изградба на ветерни турбини во нивните населени места, како што, според него, се случува во некои европски земји.
