ДУИ ЗА ИЗБОРНИОТ ЗАКОНИК Една изборна единица, но само под три услови
Интегративците велат дека електронското гласање за дијаспората веќе било прифатено решение, а гласањето по пошта не било дел од досегашните разговори.
ДУИ излезе со официјален став дека партијата би прифатила компромис околу гласањето на дијаспората, но само доколку тоа се спроведува по поштенски пат, важи исклучиво за претседателските избори и биде придружено со воведување една изборна единица.
Од ДУИ посочуваат дека прашањето за гласањето на дијаспората веќе било разгледувано во рамки на работната група за изборните реформи и дека како прифатливо решение било утврдено електронското гласање. Според партијата, предлогот за гласање по пошта не бил дел од претходно договорените решенија и претставува нов предлог надвор од досегашните разговори.
Во однос на идејата за една изборна единица, од ДУИ велат дека ја поддржуваат, но само доколку истовремено се исполнат три услови: да се воведе изборен праг од пет отсто од вкупно запишаните избирачи, да има отворени листи и сите три решенија да се применат кумулативно.
