ПОЧНА ЛИ ПУКАЊЕТО НА AI БАЛОНОТ Берзите се тресат, биткоинот паѓа, инвеститорите бегаат
По периодот на еуфорија, пазарите влегуваат во фаза на преиспитување – високите вреднувања, каматите и неизвесноста го менуваат расположението на инвеститорите.
Глобалните финансиски пазари покажуваат знаци на заладување по периодот на силен раст, бидејќи инвеститорите сè почесто ја преиспитуваат одржливоста на високите вреднувања и очекувањата за брзи приноси.
Најголем удар во изминатиот период претрпеа технолошките акции. Индексот NASDAQ минатата недела се намали за речиси 5 проценти, откако инвеститорите почнаа да се сомневаат дали досегашниот ентузијазам околу вештачката интелигенција е оправдан. Дополнителен притисок создаде информацијата дека компанијата OpenAI размислува да ја одложи својата иницијална јавна понуда за следната година, што внесе дополнителна неизвесност во AI секторот.
Нејасните сигнали од Федералните резерви на САД дополнително го зголемија вниманието на пазарите. Инвеститорите останаа поделени околу идната политика на каматните стапки, што создаде простор за различни сценарија и поголема нестабилност.
Особено погоден беше секторот на полупроводници. Иако Micron објави силни финансиски резултати со огромен раст на приходите, инвеститорите почнаа да поставуваат прашања дали масовните инвестиции во инфраструктурата за вештачка интелигенција можат да ги оправдаат високите трошоци во услови на скапо финансирање.
На поширок економски план, инфлациските показатели во САД остануваат во фокусот. PCE инфлацијата достигна 6,5 проценти, највисоко ниво од 2022 година, но резултатот беше во рамките на очекувањата. Дополнително, падот на цената на нафтата под 70 долари може да помогне во намалување на инфлаторните притисоци, иако пазарите и понатаму очекуваат можност за ново зголемување на каматните стапки.
Промена во расположението се забележува и кај алтернативните инвестиции. Цената на златото падна под 4.000 долари, додека биткоинот се спушти под границата од 60.000 долари. Со тоа повторно се отвори прашањето дали најпознатата криптовалута навистина може да се смета за „дигитално злато“.
Аналитичарите оценуваат дека биткоинот сè повеќе се однесува како ризична технолошка акција со висока волатилност, наместо како стабилно засолниште во периоди на криза. Дел од институционалните инвеститори го намалуваат изложувањето кон биткоин ETF-фондовите и капиталот го пренасочуваат кон американски државни обврзници, каде приносите се околу 4,5 проценти.
Во новите пазарни услови, инвеститорите стануваат поселектирани. Софтверските компании губат дел од привлечноста, додека компаниите поврзани со хардвер и инфраструктура за вештачка интелигенција продолжуваат да привлекуваат внимание. Во исто време, растот на цените на компонентите создава дополнителни трошоци за производителите, што веќе се одразува и кај големите технолошки компании.
Падовите не се ограничени само на еден сегмент. Компании како Coinbase, Oracle и Salesforce забележаа значителни намалувања на вредноста, што покажува дека корекцијата се шири низ поширок дел од технолошкиот сектор.
Слабеењето на приказната за биткоинот како „дигитално злато“ е само дел од поголемата промена на пазарите. По периодот на ентузијазам и високи очекувања, инвеститорите повторно се враќаат кон основните економски показатели и бараат вистинска вредност зад секоја инвестиција.
