НОВИ ОГРАНИЧУВАЊА И ПРЕНАСОЧУВАЊА НА ПАТИШТАТА Еве каде ќе возите побавно

Денеска (25.06) сообраќајот на државните патишта низ земјава се одвива непречено по суви коловози, информираат од АМСМ.

Интензитетот на сообраќај надвор од градските средини е умерен, а зголемена фреквенција на возила е забележана на граничниот премин „Богородица“. На останатите гранични премини од македонска страна нема подолги задржувања за влез и излез од државата.

Од АМСМ препорачуваат прилагодена брзина на движење и строго почитување на сообраќајната сигнализација, особено на патиштата што минуваат низ клисури, котлини и речни долини, каде постои можност за појава на одрони.

Посебна внимателност се препорачува на делниците Катланово – Велес, Маврово – Дебар – Струга, Виница – Берово и Кочани – Делчево.

Од 15 април за сообраќај е отворен патниот правец Охрид – Ресен преку Националниот парк Галичица. По оваа делница можат да се движат сите видови возила со тежина до 3,5 тона.

На автопатот А2, на делницата Гостивар – Стража, продолжува санацијата на повеќе мостови и вијадукти, поради што е воведен времен режим на сообраќај до завршување на работите.

Градежни активности се изведуваат и на мостовите на реката Вардар во близина на село Желино, како и на автопатот А1 „Пријателство“ на делницата Смоквица – Гевгелија, каде се работи на премин на интерконективен гасовод.

На скопската обиколница, на државниот пат А2, се врши рехабилитација на коловозот на потегот меѓу клучките Волково и Кондово. Поради работите, затворена е левата лента за претекнување, а сообраќајот се одвива по средната и десната лента.

Во сила останува и времената измена на режимот на сообраќај на регионалниот пат Косоврасти – Мелнички Мост поради санација на свлечиште.

Како дел од изградбата на Коридорот 10Д, во тек е времен режим на сообраќај на патниот правец Прилеп – Битола. Возилата се пренасочуваат по регионалниот пат на потегот од клучката Лагово до Тополчани, согласно поставената сообраќајна сигнализација.