ПОВРАТОК ОД СЕНКАТА 95-годишниот Кастро повторно пред камерите, случајност или порака
Американските обвинители тврдат дека Кастро стои зад соборување на авиони во 1996 година.
Поранешниот кубански претседател Раул Кастро се појави јавно на церемонија во Хавана, што претставува негово прво јавување по обвинувањата од американските федерални обвинители за неговата наводна улога во соборувањето на два авиона на кубанската емигрантска организација „Браќа на спасувањето“.
Кастро, кој неодамна наполни 95 години и веќе е повлечен од сите официјални функции, присуствуваше на одбележувањето на 65-годишнината од основањето на кубанското Министерство за внатрешни работи, одржано во театарот „Карл Маркс“ во Хавана, пренесува RTVE.
На настанот присуствуваа и претседателот на Куба Мигел Дијаз-Канел, високи државни и партиски функционери, како и членови на семејството Кастро.
Во своето обраќање, Дијаз-Канел ги отфрли американските обвинувања, оценувајќи ги како нов облик на политички притисок врз Куба. Тој нагласи и дека улогата на Кастро во историјата на земјата е значајна, велејќи дека „Раул е Куба, а Куба е недопирлива“.
Според американското обвинение, Кастро, кој во времето на инцидентот бил министер за одбрана, наводно наредил соборување на два цивилни авиона во февруари 1996 година над меѓународни води, при што загинале четири лица. Овој настан долгорочно ги влоши односите меѓу Вашингтон и Хавана.
Кубанските власти ги отфрлаат обвиненијата, тврдејќи дека се политички мотивирани и насочени кон оправдување на дополнителни мерки против островот.
На церемонијата, министерот за внатрешни работи Лазаро Алварез прочита порака од Кастро, во која тој повикува државните институции да продолжат со работа во дух на „ред, контрола и одговорност“ во услови на сложена политичка и економска состојба.
Кубанската државна телевизија емитуваше снимки од настанот, што е прво негово јавно појавување по прославата на Меѓународниот ден на трудот на почетокот на мај, непосредно пред објавувањето на американското обвинение.
