СЕМЕЈНА ТРАГЕДИЈА Родители и две деца од Македонија загинаа на пат кон свадба

Возачот на автобусот кој учествувал во тешката сообраќајна несреќа во американската сојузна држава Вирџинија, во која загинаа пет лица, меѓу кои и четиричлено македонско семејство, може да се соочи со казна до 100 години затвор, зависно од конечната квалификација на делата.

Несреќата се случила ноќта меѓу 29 и 30 мај 2026 година, околу 2:35 часот по полноќ, на јужната лента од автопатот I-95 во округот Стафорд. Во моментот на судирот, сообраќајот бил забавен поради работна зона. Според првичните информации од полицијата на Вирџинија, автобусот не успеал навреме да намали брзина и удрил во повеќе возила, при што биле зафатени вкупно шест автомобили.

Автобусот, кој сообраќал на релација Њујорк – Шарлот и бил во сопственост на компанијата E&P Travel, превезувал 34 патници. Во несреќата животот го загубиле пет лица, а 44 биле повредени и пренесени во болница, од кои тројца се во тешка состојба. Возачот на автобусот, Јинг С. Донг (48) од Статен Ајленд, Њујорк, исто така бил повреден и опериран.

Меѓу жртвите е четиричлено македонско семејство од Масачусетс: Димитар Дончев (45), медицински работник, неговата сопруга Катерина Дончева (44), фризерка, и нивните деца Емилија (13) и Марк (7). Семејството патувало кон Јужна Каролина за свадбена прослава на роднина. Петтата жртва е Присила Мафалда (25) од Ворчестер, Масачусетс.

Полицијата го обвини возачот за повеќе случаи на ненамерно убиство, а се очекува можност за дополнителни обвиненија. Според законодавството во Вирџинија, секој поединечен случај може да носи до 10 години затвор, што теоретски значи дека казната може да се зголемува со бројот на жртви.

Во зависност од развојот на истрагата, можно е обвинението да се преквалификува во потешка форма на убиство од небрежност, што носи значително повисоки казни по секој поединечен случај. Сепак, во пракса, во вакви сообраќајни несреќи со повеќе жртви, судската пракса често резултира со пократки затворски казни, особено доколку не се утврди употреба на алкохол или дроги.

Истрагата продолжува, а федералните служби ги проверуваат дозволите и обуката на возачот, вклучително и неговата професионална лиценца издадена во Њујорк во 2024 година. Дел од официјалните лица изразиле загриженост и за можни јазични бариери во комуникацијата.

Трагедијата предизвика долготрајно затворање на дел од I-95, додека семејствата на жртвите, меѓу кои и роднините на Дончеви, соопштија дека свадбената прослава ќе продолжи, но сега во знак на жалост.