СЕ ОГЛАСИ ХАМНЕИ И ПОЛИТИЧКИТЕ ЛИДЕРИ НА ИРАН – Нема поделби, жесток одговор до Трамп

Врховниот водач на Исламската револуција, Сејед Моџтаба Хосеини Хамнеи, денес порача дека силното единство на иранскиот народ создава раздор меѓу противниците и дополнително ја зајакнува внатрешната кохезија на државата.

Во објава на мрежата X, тој истакна дека „невообичаеното единство“ меѓу граѓаните ги нарушува, како што наведе, плановите на оние кои сакаат да го ослабат Иран, нагласувајќи дека тоа единство треба да се зачува и зајакне преку конкретни постапки. Информацијата ја пренесе иранската Press TV.

Хамнеи предупреди дека медиумските и психолошките кампањи на „непријателите“ имаат цел да влијаат врз јавното мислење и да го поткопаат националното единство и безбедноста, повикувајќи на внимателност за да не се дозволи, како што рече, таквите намери да успеат.

Тој додаде дека постои „психолошка војна“ насочена кон ослабување на стабилноста и единството во земјата. Во истата порака се спомнува и дека, според неговите тврдења, САД и Израел започнале голема воена кампања против Иран на 28 февруари, по што следеле ирански одмазднички напади со ракети и беспилотни летала кои траеле повеќе од 40 дена.

Во меѓувреме, иранскиот претседател Масуд Пезешкијан и претседателот на парламентот Мохамад-Багер Калибаф ги отфрлија изјавите на американскиот претседател Доналд Трамп за наводни внатрешни поделби во Иран, нагласувајќи дека во земјата нема разлика меѓу „тврдокорни“ и „умерени“ фракции, туку дека сите се, како што велат, единствени како Иранци и револуционери.

Сличен став изнесе и министерот за надворешни работи Абас Аракчи, кој порача дека Иранците се пообединети од кога било. Трамп претходно изјави дека во Иран постојат различни групи во конфликт, што, според него, го отежнува разбирањето на политичката ситуација во земјата.