СПЕЦИЈАЛНА ОФАНЗИВА – Американски специјални сили на чекор од операција во Иран

Претседателот на Соединетите Американски Држави, Доналд Трамп, разгледува можност за испраќање на специјални сили во Иран со цел запленување на високо збогатен ураниум, поради загриженост дека залихите се префрлени, јавуваат извори за Блумберг запознаени со дипломатските планови.

Покрај ураниумот, официјални лица од американската администрација изјавиле за Axios дека биле разгледувани и планови за запленување на островот Харг, нафтен терминал кој сочинува околу 90% од иранскиот извоз на сурова нафта.

Американските и израелските официјални лица активно бараат високо збогатен ураниум и имаат подготвени планови за непредвидени ситуации, вклучувајќи распоредување на специјални сили доколку се потврди неговата локација, изјави еден од изворите за Блумберг.

За потсетување, САД и Израел претходно нападнаа клучни ирански нуклеарни објекти за време на 12-дневната војна во јуни минатата година. Неизвесноста околу високо збогатениот ураниум се зголеми бидејќи поминаа речиси девет месеци од последната потврда на неговата локација од страна на инспекторите на Обединетите нации, изјавиле анонимни официјални лица.

Во последните месеци, американските и израелските власти интензивно бараат залихи од високо збогатен ураниум во Иран, кој, ако се обработи дополнително, наводно би можел да се искористи за производство на околу 11 нуклеарни боеви глави.

Набљудувачите од Меѓународната агенција за атомска енергија со седиште во Виена забележале зголемена активност надвор од тунелите изградени во ридот во близина на Исфахан, каде материјалот последен пат беше документиран пред почетокот на конфликтот. Таа активност ја зголемува можноста дека дел од 441 килограм високо збогатен ураниум складиран во комплексот бил преместен, изјавил еден од изворите за Блумберг.