ДИПЛОМАТСКО РЕШЕНИЕ НАМЕСТО ВОЈНА – Кина ја повикува меѓународната заедница

Кинескиот министер за надворешни работи, Ванг Ји, оцени дека нападот на Соединетите Американски Држави и Израел врз Иран претставува опасна ескалација која не користи на ниту една страна и дополнително ја дестабилизира ситуацијата на Блискиот Исток.

Ванг Ји истакна дека започнувањето на нова војна во регионот претставува сериозен удар врз меѓународната безбедност и повика сите страни веднаш да ги прекинат непријателствата.

„Војната на Блискиот Исток не требаше да започне и не е во интерес на никого“, нагласи тој.

Шефот на кинеската дипломатија посочи дека меѓународното право мора да остане основата за решавање на кризата и предупреди дека воената ескалација може да предизвика поширока регионална нестабилност.

„Потребно е веднаш да се прекинат борбените операции, а суверенитетот на Иран и на сите земји од Персискиот Залив мора да се почитува“, додаде Ванг Ји.

Во последните денови, Пекинг постојано повикува на политичко и дипломатско решение на кризата, предупредувајќи дека продолжувањето на конфликтот меѓу САД, Израел и Иран би можело да има сериозни последици за стабилноста на Блискиот Исток и за глобалната безбедност.