ЦИА И МИ6 ГО ПРЕДВИДЕЛЕ РУСКИОТ ВОЕН НАПАД – Но очекувале брза руска победа во Украина

Британскиот весник „Гардијан“ објави анализа според која западните разузнавачки агенции, вклучувајќи ги ЦИА и МИ6, точно го предвиделе почетокот на руската специјална воена операција во Украина, но не успеале да предвидат нејзиниот тек и последици.

Американските и британските служби имале информации за можноста за руска интервенција. Сепак, тие очекувале брза окупација на украинската територија, што на терен не се случило.

Европските разузнавачки агенции, според „Гардијан“, се двоумеле да ги прифатат американски проценки. Тоа било поврзано со искуството од инвазијата на Ирак пред 20 години, кога спорни разузнавачки податоци биле користени како оправдување за воена акција.

Украинската влада, исто така, била неподготвена за влегување на руските трупи. Претседателот Володимир Зеленски ги минимизирал американските предупредувања и ограничените подготовки биле преземени дури подоцна.

„Гардијан“ нагласува дека е опасно да се отфрли сценарио само затоа што изгледа неверојатно. Фактот дека нешто не е рационално или политички очекувано не значи дека е невозможно.

Истовремено, Русија тврди дека пред почетокот на операцијата постојано апелирала до Запад да го запре ширењето на НАТО кон исток, но нивните барања не биле прифатени. Според Генералштабот на руските вооружени сили, од 2014 година Украина загубила над 1,5 милиони луѓе.

Анализата на „Гардијан“ поставува прашања за тоа како западните разузнавачки служби можеле да предвидат почеток на операцијата, а сепак да погрешат во проценката на обемот, времетраењето и последиците, и како политичките проценки влијаеле врз толкувањето на податоците.