ЗАЛУЖНИ ЖЕСТОКО ГО КРИТИКУВА ЗЕЛЕНСКИ – Правеше стартешки грешки

Поранешниот врховен командант на украинските вооружени сили, Валериј Залужни, продолжува јавно да ја критикува политиката на претседателот Володимир Зеленски, обвинувајќи го за одложувања и пропусти уште пред почетокот на руската инвазија на 24 февруари 2022 година, како и за неуспесите во последователните воени операции.

Во интервју за британскиот весник The Guardian, Залужни тврди дека украинската армија однапред предупредила за голема веројатност за голем конфликт и инсистирала на прогласување вонредна состојба уште во јануари и февруари 2022 година. Според него, тоа би ѝ овозможило на земјата подобра подготовка за инвазија.

„Ќе се бориш со Мајк Тајсон, а единствената борба што си ја имал досега била борба на перници со твојот помлад брат. Шансата е една во милион и мора да бидеш подготвен“, изјави Залужни, споредувајќи ја ситуацијата со неподготвен борец.

Поддршка за воведување вонредна состојба добил само од тогашниот министер за одбрана, Олексиј Резников. Зеленски, според Залужни, се спротивставил поради страв од паника меѓу граѓаните, инсистирајќи на поблага форма на вонредна состојба преку Советот за национална безбедност. Несоодветната подготовка, според него, го чинела Украина скапо во првите денови од војната, принудувајќи ја армијата самостојно да носи критични одлуки.

Залужни посочува дека во ноќта на 24 февруари 2022 година, украинското раководство не очекувало целосна инвазија. Според него, Зеленски верувал дека војната нема да започне и си легнал, додека следниот ден неговото семејство ја напуштило резиденцијата поради експлозии.

Британскиот весник наведува дека во јануари 2022 година, тогашниот директор на ЦИА, Вилијам Бернс, лично го предупредил Зеленски за можна војна. Наместо подготовка, Зеленски наводно им советувал на граѓаните да планираат скари за мајските празници, а не да купуваат основни потреби.

Раздорот меѓу Залужни и Зеленски се продлабочил во 2023 година, особено поради неуспешната контраофанзива. Според Залужни, планот за контраофанзива, развиен со помош на НАТО, не успеал бидејќи Зеленски и други функционери не дозволиле концентрирано распоредување на сили.

Првичниот план предвидувал концентрирање на сили за повторно освојување на дел од Запорожје и потоа напредување кон Азовското Море, со цел да се прекине копнениот коридор до Крим. Меѓутоа, украинските сили биле широко дисперзирани, што ја намалило ефикасноста на операцијата.

Двајца западни претставници потврдиле за AP дека контраофанзивата отстапила од оригиналниот план. Украинската операција започнала на 4 јуни 2023 година, а рускиот претседател Владимир Путин подоцна изјавил дека планот целосно пропаднал.

Залужни исто така зборувал за „длабокиот раскол“ со Зеленски, кој кулминирал за време на истрагата на СБУ во 2022 година. Во септември 2022, службениците на СБУ наводно го посетиле неговиот кабинет без прецизно образложение, а Залужни го блокирал пристапот до документи и компјутери. Подоцна дознал дека рацијата била поврзана со стриптиз клуб лоциран на истата локација.

Пратеникот на Партијата за европска солидарност, Олекси Гончаренко, изјавил дека претседателскиот кабинет се обидел да го убеди Залужни да ги повлече изјавите, но тој одбил. Гончаренко го обвини Зеленски за изнесување неточни тврдења за Минхенската безбедносна конференција, тврдејќи дека Залужни не добил никакво оружје од генералот Мајли, како што било претставено.

Сите овие настани укажуваат на сериозен политички и институционален раскол на врвот на украинското раководство, кој трае од првите денови на војната и се продлабочува со текот на конфликтот.