СОБРАНИЕТО ГО УСВОИ ЗАКОНОТ ЗА СУДСКИ СОВЕТ Еве кои се клучните новини
73 гласа „за“ и еден „воздржан“ довозлни за законските измени да добијат поддршка во Собранието
Со 73 гласа „за“ и еден „воздржан“, Собранието денеска го усвои Законот за Судски совет.
Главната цел на измените е да се отстранат слабостите во досегашната правна рамка и да се создаде пофункционален, транспарентен и отчетен Судски совет.
Клучните новини во законот вклучуваат јавност во постапката за разрешување на претседателот на Судскиот совет, прецизирање на критериумите за избор на „истакнат правник“ и воведување јавна расправа при избор на кандидатите за не-судски членови, со цел поголема транспарентност и одговорност.
Исто така, законот го зајакнува процесот за избор, одговорност и разрешување на членовите на Советот од редот на судиите, ја прецизира постапката за дисциплинска одговорност на судиите и членовите на Судскиот совет, и воведува обврска Советот да ги образложува своите одлуки за избор и утврдување одговорност на судиите.
Дополнително, предвидени се утврдување рокови за преземање дејствија по дисциплинските постапки, прецизирање на основите и постапката за жалба против одлуките на Судскиот совет и други решенија за унапредување на целокупната правна рамка согласно препораките на Европската унија.
Сепак, новите критериуми за избор а пред се критериумот за „истакнат правник“ нема да важат за полицискиот инспектор Аљбан Кадриу од Тетово, кого Собранието го предлага за член на Судскиот совет. Неговото именување ќе се спроведе без заострени критериуми, бидејќи процесот веќе е започнат.
Законот предвидува и зајакнување на критериумите за избор, одговорност и разрешување на членовите на Советот од редот на судиите, како и јасно утврдување на постапките за дисциплинска одговорност на судиите и на членовите на Судскиот совет.
На денешната седница, Собранието исто така изгласа и потреба за оглас за именување на нов јавен обвинител.
