ХАОС ВО АВИОСООБРАЌАЈОТ – Маглата откажа 20 летови на аеродромот во Скопје

Поради намалената видливост предизвикана од густа магла, на Меѓународниот аеродром Скопје во периодот до 20 часот вечерва се откажани вкупно 20 летови (полетувања и слетувања), два се пренасочени, а реализирани се по 13 слетувања и полетувања, информираат од ТАВ Македонија.

На аеродромот слетале авиони од Дортмунд, Виена, Хамбург, Брисел, Белград, Загреб, Франкфурт, Венеција, Париз (Буве), Берлин, Минхен (Меминген) и Цирих. Истовремено, реализирани се летови кон Виена, Белград, Загреб, Брисел, Хамбург, Баден-Баден, Франкфурт, Берлин, Варшава, Базел и Барселона, додека летовите за Рим (Фјумичино) и Малме се најавени за полетување.

Од ТАВ Македонија посочуваат дека временските услови се менуваат често, а секоја авиокомпанија има различни оперативни стандарди за слетување и полетување при намалена видливост. Поради тоа, апелираат патниците редовно да ги следат информациите добиени директно од авиокомпаниите.

„Аеродромот е отворен за авиосообраќај и сите капацитети се целосно функционални. Нашиот персонал и аеродромските системи работат 24 часа и се подготвени да ги услужат патниците и авионите“, велат од ТАВ Македонија.

Промените во редовниот распоред на летање се ажурираат во реално време на официјалната веб-страница на аеродромот, а патниците за дополнителни информации можат да се обратат на информативниот пулт во терминалот или на телефонскиот број +389 2 3148 333.

Од Авто-мото сојузот на Македонија информираат дека сообраќајот на државните патишта се одвива непречено, по претежно суви коловози. Намалена видливост поради магла до 30 метри има на патниот правец Жировница – Луково, а до 150 метри во околината на Тетово, Штип, Петровец и Демир Капија. Потсетуваат дека во сила е законската обврска за задолжително поседување зимска опрема во возилата.

Управата за хидрометеоролошки работи најави дека маглата ќе се задржи во котлините до крајот на денот, а ќе ја има и во наредните два дена. Кон крајот на утрешниот ден и во следните денови се очекуваат повремени локални врнежи од дожд, а на планините и на повисоките места, поради продор на постуден воздух од север, врнежите ќе преминуваат во снег.