РУСИЈА РАСКИНУВА СО ВОЕНА СОРАБОТКА СО ЕВРОПА – Нови ограничувања во одбраната

Руската влада го овласти Министерството за одбрана да раскине неколку билатерални договори за воена соработка со европските земји. Наредбата е објавена на официјалниот портал на правни акти, а договорите се потпишани меѓу раните 1990-ти и раните 2000-ти, пренесува РИА Новости.

Според документот, руското Министерство за одбрана има овластување да ги раскине договорите со Германија потпишан во Москва на 13 април 1993 година, со Полска за билатерална воена соработка од 7 јули 1993 година, Норвешка за воена соработка од 15 декември 1995 година, Бугарија од 4 август 1992 година, Романија од 28 март 1994 година, Данска од 8 септември 1994 година, Велика Британија и Северна Ирска од 18 март 1997 година, Холандија од 18 јуни 1997 година, Хрватска од 18 декември 1998 година, Белгија од 19 декември 2001 година и Чешка од 16 април 2002 година.

Со оваа одлука, Русија продолжува со политиката на ограничување на формалната воена соработка со западните земји.

Претходно, на 5 декември, беа раскинати договорите за воена соработка со Франција (1994), Канада (1989) и Португалија (2000).

Премиерот Михаил Мишустин претходно потпиша наредба за раскинување на договорот за воено-техничка соработка со Германија. Министерството за надворешни работи го оцени документот како „застарен“ и обвини дека Берлин ја надминува рамката на нормалната надворешна политика.

Во јуни беше раскинат договорот со Шведска за размена на информации за нуклеарни објекти и известување за инциденти.