РАЗГОВОРИ ВО БЕРЛИН Нови безбедносни гаранции за Украина без американски трупи

По интензивни и повеќечасовни разговори одржани во Берлин со претставници на украинската страна, Соединетите Американски Држави и нивните партнери дополнително го разработиле безбедносниот пакет за Украина, кој содржи елементи инспирирани од Членот 5 на НАТО, изјави висок американски функционер, пренесува германската новинска агенција ДПА.

Според него, станува збор за сет мерки чија цел е зајакнување на чувството на сигурност кај украинското население, преку механизми за рано следење и спречување на евентуални нови судири. Функционерот нагласи дека овие договори не подразбираат распоредување на американски војници на украинска територија.

Американската страна изрази надеж дека Москва ќе ги разгледа предложените планови, оценувајќи дека тие претставуваат чекор кон деескалација и стабилизирање на безбедносната состојба во регионот.

Членот 5 од Северноатлантскиот договор предвидува колективна одбрана, односно дека секој вооружен напад врз една членка на НАТО се смета за напад врз сите сојузници, принцип кој досега претставува клучен столб на Алијансата.

Во разговорите во Берлин учествуваат и специјалниот пратеник на САД, Стив Виткоф, како и Џаред Кушнер, зет и поранешен близок соработник на поранешниот американски претседател Доналд Трамп. Двајцата се во германската престолнина од викендот, каде што се вклучени во дипломатските напори за изнаоѓање можен пат кон завршување на руската војна против Украина.