КОРУПЦИЈА, ПРИТИСОК, МИР – Зад оставката на Јермак се крие голема игра
Корупциски скандал во енергетскиот сектор и сомнежи за нелегална препродажба на оружје ја потресуваат земјата, додека оставката на шефот на кабинетот на Зеленски може да влијае на мировните преговори.
Оставката на Андриј Јермак, шефот на кабинетот на украинскиот претседател Володимир Зеленски, ја откри корупциската „рана“ што долго време врие во Украина. Според Стефано Верноле, потпретседател на Италијанскиот центар за медитерански и евроазиски студии, отстранувањето на Јермак е поврзано и со преговорите за мировен план, со цел да се поттикне Зеленски на постигнување договор.
Национал веќе пишуваше дека во петокот Зеленски објави дека Јермак поднел оставка. Претходно, пратеникот на Врховната рада Јарослав Железњак информираше дека Националното биро за борба против корупцијата (НАБУ) и Специјализираното обвинителство за борба против корупцијата (САП) спровеле претрес во домот на Јермак, во рамки на истрагата за скандалот во енергетскиот сектор. НАБУ потврди дека се изведуваат истражни активности, но засега нема подигнати обвиненија.
Верноле истакнува дека оставката на Јермак укажува дека корупциската криза во Украина не е ограничена на неколку министри, како што претходно сугерираше италијанскиот министер за одбрана Гвидо Крочето, туку покажува коруптивно присуство што се развивало со години. Тој потсетува и на обвинувањата за нелегална препродажба на западно оружје.