ГЕРМАНСКИОТ КАНЦЕЛАР ДО ТРАМП Руските замрзнати средства ќе се користат само преку ЕУ

Германскиот канцелар Фридрих Мерц изјави за телевизијата АРД дека Соединетите Американски Држави не можат да располагаат со замрзнатите руски средства во Европа. Тој оцени дека американската иницијатива дел од овие пари да се префрлат во Украина за реконструкција, при што Вашингтон би добил половина од профитот, е неприфатлива.

„Тоа е неприфатливо и токму затоа Европејците седат на преговарачката маса. Некои делови од американскиот план од 28 точки не можат да се спроведат без наша согласност. Станува збор за руски средства кои би се користеле како гаранција за заем“, рече Мерц, коментирајќи ја иницијативата на американскиот претседател Доналд Трамп да ги користи замрзнатите руски средства заобиколувајќи ја ЕУ.

Тој нагласи дека доколку заемот биде одобрен, тоа ќе се направи преку Европската Унија, а средствата потоа ќе бидат предадени на Украина за купување оружје.

„САД не можат директно да управуваат со тие пари, а барањето за дополнителни 100 милијарди од Европа исто така не е нешто со што можеме да се согласиме“, додаде Мерц.

Американската администрација претходно објави дека развива план за украинско решение, но засега не ги објавува деталите. Кремљ, пак, соопшти дека Русија останува отворена за преговори и посветена на договорите од Анкориџ. Според медиумите, една од точките на американскиот план предвидува користење на 100 милијарди евра замрзнати руски средства за обнова на Украина, при што САД би добиле половина од профитот.