МИР ИЛИ ТЕРИТОРИИ – Зеленски го доби нацрт-планот на САД

Украинскиот претседател Володимир Зеленски имаше телефонски разговори со францускиот претседател Емануел Макрон, германскиот канцелар Фридрих Мерц и британскиот премиер Кир Стармер за мировниот план за Украина, кој е изготвен од страна на САД.

„Разговаравме за мировниот план за Украина и цела Европа. Ги цениме напорите на САД, претседателот Трамп и неговиот тим насочени кон завршување на оваа војна. Работиме на документ подготвен од американската страна. Ова мора да биде план што обезбедува вистински и достоинствен мир“, напиша Зеленски на платформата X.

Тој додаде дека координацијата меѓу тимовите е во тек за да се осигури дека се почитуваат принципиелните ставови, и дека следните чекори се усогласени на соодветно ниво.

Украинскиот претседател го доби нацрт-планот од американската администрација и очекува да има разговор со претседателот Доналд Трамп во наредните денови.

Според медиумски извештаи, планот предвидува: Украина да го внесе во Уставот својот ненуклеарен статус и забрана за членство во НАТО; де факто признавање на Крим, Донецк и Луганск како руски територии; замрзнување на линијата на фронтот во Херсон и Запорожје; забрана за распоредување на НАТО-трупи во Украина; одржување на избори во рок од 100 дена и амнестија за сите учесници во војната.

Американската иницијатива следува во време кога украинските сили се во тешка позиција на фронтот, а владата на Зеленски е погодена од корупциски скандал, поради што парламентот разреши двајца министри.

Москва ја намали важноста на новата иницијатива. Портпаролот на Кремљ, Дмитриј Песков, изјави дека „консултациите не се во тек“ и дека „нема процес што би можел да се нарече преговори“. Русија стои зад барањата што ги постави претседателот Владимир Путин на самитот со Трамп во август, наведувајќи дека секој мировен договор мора да ги реши „коренските причини за конфликтот“.

Медиумите, пак, јавуваат дека администрацијата на Трамп тајно работи на нов план за завршување на војната во Украина, во консултација со Русија, што портпаролот на Кремљ го негира. Reuters, пак, информира дека САД му сигнализирале на Зеленски дека Киев мора да прифати рамка во која се предлага Украина да се откаже од дел од територијата и дел од оружјето.