РОСИЦА И НЕЈЗИНИОТ ТАTКО СЕ МРТВИ – Револт поради одлуките на судството и обвинителството
Активисти и јавни личности бараат кривична и дисциплинска одговорност за надлежните, како и законски измени со кои насилниците нема да можат да добиваат условни казни.
Убиството на 31-годишната Росица Коцева и нејзиниот татко од нејзиниот поранешен партнер ја крена јавноста на нозе. Реакциите се насочени кон судиите и обвинителите кои му укинале притвор и изрекле условна казна за претходни дела на насилство.
Активисти и јавни личности бараат кривична и дисциплинска одговорност за надлежните, како и законски измени со кои насилниците нема да можат да добиваат условни казни.
Кој затаи во однос на трагедијата во Велес, кога Илија Стефановски ја уби својата поранешна партнерка Росица Коцева и нејзиниот татко, а потоа си го одзеде животот, отвори лавина прашања. Зад крвавото злосторство стојат десетици пријави за закани и насилство, полициски записници, судски одлуки и психијатриски вештачења. И покрај сите аларми, системот не успеа да ја заштити жртвата.
Психолози предупредуваат дека кај случај со толку многу дојави, институциите морале ефикасно да реагираат и сторителот да биде под постојан надзор. Иако психијатриското вештачење не регистрирало ментално нарушување кај Стефановски, крватото дело на ваков чин не може да го изврши личност без психолошки проблем.
