БРАЗИЛСКАТА ЕКОНОМИЈА ЗАБЕЛЕЖУВА ЗАБАВУВАЊЕ Сепак се движи во добра насока

Во вториот квартал, економијата на Бразил забележа забавување, но сепак успеа да ги надмине предвидувањата на аналитичарите, благодарение на силниот сектор на услуги и растот во екстрактивната индустрија, покажуваат официјалните податоци. Според статистичката агенција IBGE, бруто домашниот производ (БДП) на најголемата економија во Латинска Америка пораснал за 0,4% во периодот од април до јуни во однос на претходниот квартал, што е над очекуваниот раст од 0,3%, пренесува Reuters.

Сепак, оваа стапка на раст претставува значително забавување во споредба со ревидираниот раст од 1,3% во првиот квартал, кога полјопривредата имаше значајна улога во економскиот напредок. Во вториот квартал, производството во аграрниот сектор опадна за 0,1%. Од друга страна, индустриското производство се зголеми за 0,5%, а екстрактивниот сектор забележа раст од 5,4%. Секторот на услуги, кој учествува со околу 70% во бразилскиот БДП, порасна за 0,6%, што се објаснува со силниот пазар на труд.

Од аспект на побарувачката, инвестициите, мерени преку бруто фиксниот капитал, паднаа за 2,2% по значителниот раст во првиот квартал, со оглед на тоа дека високите каматни стапки влијаеа на вложувањата. Централната банка на Бразил од септември минатата година ги зголеми каматните стапки за 450 базни поени, достигнувајќи 15%, што е највисоко ниво во последните две децении, и ги задржа на тоа ниво и во јули.

Државната потрошувачка се намали за 0,6%, додека потрошувачката на домаќинствата порасна за 0,5%, поддржана од мерките на владата на претседателот Луиз Инасио Лула да Силва, кои имаат за цел да го поттикнат растот на платите. На годишно ниво, БДП на Бразил порасна за 2,2%, што е во согласност со очекувањата од анкетите. Владата во јули предвиде раст од 2,5% за 2025 година, по ланскиот раст од 3,4%.