26 ПОЖАРИ ЗА ЕДНО ДЕНОНОЌИЕ Два и натаму активни
ЦУК регистрира пожари на повеќе локации низ земјава, при што на терен интервенираат надлежните служби.
Во изминатото деноноќие во земјава се регистрирани вкупно 26 пожари на отворен простор, од кои два и натаму се активни, четири се ставени под контрола, а 20 се целосно изгаснати, информира Центарот за управување со кризи (ЦУК).
Според последните информации, заклучно со 7:30 часот, активни се пожарите меѓу селата Копаница и Радуша во Општина Сарај, каде гори нискостеблеста шума и ниска вегетација, како и пожарот во штипскиот регион, на потегот меѓу селата Селце, Пухче, Степанци и Лакавица, каде е зафатена ниска вегетација.
Под контрола се ставени пожарите во реонот на селата Битово, Заград и Страјане во Општина Македонски Брод, каде гореле нискостеблеста шума, ниска вегетација, пасишта и папрат. Под контрола е и пожарот на Градската депонија „Острец“ во Делчево, како и пожарите кај Драгов Дол во Македонски Брод и над селото Палиград во Општина Зелениково.
Во текот на изминатото деноноќие се изгаснати и 20 пожари на различни локации низ државата. Интервенции имало кај селата Градец во Врапчиште, Подмочани во Ресен, Нежилово во Чашка и Урвич во Боговиње, како и на повеќе локации во општините Гази Баба, Струга, Долнени, Кичево, Ново Село, Старо Нагоричане, Желино, Кавадарци и Свети Николе.
Од ЦУК посочуваат дека состојбата со пожарите се следи континуирано и дека надлежните служби интервенираат согласно потребите на терен.
