ЗЛАТОТО ДОСТИГНА РЕКОРДНИ 4.000 ДОЛАРИ ПО УНЦА – Доларот ослабе за 10%
Порастот на цената дојде по намалувањето на каматните стапки од страна на Федералните резерви во септември.
Цената на златото во вторник за првпат ја проби историската граница од 4.000 долари за унца, поттикната од падот на американскиот долар, зголемената геополитичка тензија и стравовите од упорна инфлација.
Фјучерсите за злато се затворија на 4.004,40 долари, по интрадневен врв од 4.014,60 долари – раст од околу 50% од почетокот на годината. Слабеењето на доларот за 10% и политичките потези на американскиот претседател Доналд Трамп, кои го нарушија глобалниот трговски систем и ја ставија под прашање независноста на Федералните резерви, дополнително ја зголемија побарувачката за благородниот метал.
Централните банки, особено Кина, интензивно купуваат злато во обид да се оддалечат од американските државни обврзници, додека малите инвеститори се свртуваат кон златото како заштита од инфлацијата.
Порастот на цената дојде по намалувањето на каматните стапки од страна на Федералните резерви во септември, што ги направи краткорочните обврзници помалку атрактивни. Пазарот сега очекува уште две дополнителни намалувања на каматите пред крајот на годината.
Иако златото се смета за сигурна инвестиција во време на нестабилност, Банката на Америка предупреди дека пазарот покажува знаци на „исцрпеност на растот“, што би можело да доведе до временска консолидација или корекција во последниот квартал од годината.
